Kunngissap nulia Mary Sidneymut tikippoq
Australiami tusagassiorfiit malillugit kunngissap nulia Mary Sydneymut tikereerpoq. Pisortatigoortumik tikeraarneq sapaatiuppat aallartissaaq
Kunngissap nulia Mary arfininngormat Sydneymut tikippoq, taamatut nalunaaruteqarpoq The Australian.
Netaviisi malillugu kunngissap nulia illoqarfimmut siusinnerusukkut najugaqarfigisaminut tikippoq arnaq meeqqanik paarsisoq kunngissakkullu marluliaataat Josephine aamma Vincent, qulinik qaammatillit, ilagalugit.
Kunngissaq arfininngornermi kingusinnerusukkut tikissangatinneqarpoq.
Kunngissap Frederiup nuliatalu Maryp tikeraarnerannut pissutaavoq Australiap sapaatit akunnerini aggersuni misigissammassuk Danmarki naalagaaffittut mingutsitsinngitsutut silallu pissusianik mianerinnittutut.
Arfininngornermit sapaatip akunnera ataaseq pisortatigoortumik tikeraassapput, ingerlatsiviit 50 angullugit amerlassusillit peqatigalugit Danmarki nittarsaatissallugu taasamik "State of Green", australiamiullu paasitinniassallugit qallunaat nukissamik teknologimillu mingutsitsinngisumik immikkut ilisimasaqarnerannik.
The Australian malillugu kunngikkormiut angalanertik ulluni marlunni Sydneymiillutik aallartissavaat, sapaatiuppat illoqarfiup avataani Bondimi katersugaasivimmukassallutik, tassani ilaatigut qallunaap assilialianik qiperuisartup Keld Moseholmip qiperugai takuniarlugit.
Marlunngormat illoqarfimmut naalakkersuisoqarfimmut Canberra-liassapput, tassani ilaatigut Australiap premierministeria Julia Gillard ilassissallugu.
Tikeraarnerisa immikkoortua kingulleq Melbournemi ingerlanneqassaaq, tassanngaanniillu kunngissaq Frederik inuussutissarsiortunit aallartitat ilgalugit Vietnamiliassaaq, Danmarkip Vietnamillu aallartitaqarfeqalernerisa ukiunik 40-unngortorsiornerat nalliussiartorlugu.
Mary nunami inunngorfimminiiginnassaaq malulisdat Vincent aamma Josephine, angalaneq tamaat peqataasussat, ilagalugit. Frederik decembarip aallaqqaataani Vietnamimit uterpag ilaqutariit qeqertamut kunngissap nuliata inunngorfianut Tasmaniamut ingerlassapput.
Kunngissakkut aappassaa pisortatigoortumik Australiamut tikeraarput, arlaleriarlutilli inuinnartut Maryp ilaqutai ikinngutaalu tikeraartarsimallugit.
Kunngissakkut 2000-imi Sydneymi De Olympiske Lege-t ingerlanneqarneranni naapipput. /ritzau/