Kuupik: Aalisarpallaarneq unitsinneqassaaq
Naalakkersuisut siulittaasuata Kuupik Kleistip ukiortaami oqalugiarnermini erseqqissarpaa naalakkersuisooqatigiit siuliisa ajortuliaat qimanneqassasut, aalisarpallaartitsisarneq eqqarsaatigalugu.
- Erseqqissarneqassaaq naalakkersuisut pisuussutinik uumassusilinnik nungusaataanngitsumik atuinermik tunngaviit aalajangiusimammatigit. Immitsinnut piinnarnata aammattaarli kinguaariit tullliuttut pisuussutinik uumassusilinnik iluaquteqarnissaat eqqarsaatigalugu, Kuupik Kleist, Inuit Ataqatigiit, ukiortaami oqalugiarnermini erseqqissaavoq.
Tamatuma saniatigut naalakkersuisut siulittaasuata erseqqissarpaa 2010 ukioq tassaassasoq aalisarnermik piniarnermillu inuussutissarsiuteqarnerit pisariaqavissumik naleqqussarfissaat.
- Pisariaqarluinnarpoq inuussutissarsiutinut piffissamut sivisuumut uppernartunillu pilersaarusiornissat. Pisariaqartumik nungusaataanngitsumik pisaqartarnissaq eqqarsaatigalugu kiisalu atuisartut piumasaqaataat sakkortusigaluttuinnartut eqqarsaatigalugit naleqqussaaneq nangissavarput, Kuupik Kleist oqarpoq.
Tamanna peqatigalugu tamatumani kattuffinnik oqaloqatigiittarnerit ingerlaannarnissaannut qaaqqusivoq, qulakkeerniarlugu aalisarnermik inuussutissarsiornerup aningaasarsiornikkut ingerlasinnaanera annertunerusumillu inuiaqatigiit isertitaqarnerannut peqataanissaa.
Kiisalu naalakkersuisut siulittaasuata erseqqissarpaa nuannersuusoq Pinngortitaleriffimmi biologit piniartullu suleqatigiinnerisigut pitsaanerusumik tunngaveqarluni pisassiisoqarsinnaalersimanera.
Ukiortaami oqalugiaat tamaat kalaallisut qallunaatulluunniit talerpiatungaani aaneqarsinnaapput.