Kuupik Abel-ilu iliseqataasut
Tine Bryld-ip ilisaanerani Nunarput sinnerlugu peqataasut assigiinngeqaat - Naalakkersuisut siulittaasuanniit inunnik arfineq marlunnik toqutsinikumut. Inuit 350-it missaanniittut iliseqataapput.
Af Christian Schultz-Lorentzen, AG
- Tine (Bryld, aaqq.) minnerunngitsumik kalaallinik ajornartorsiutilinnik Danmarkimi najugalinnik sullissinermigut, Kalaallit Nunaannut sunniuteqarluarsimavoq. Sullitami akornanni maqaasineqassaaq. Akornatsinniikkunnaarneratigut annertuumik annaasaqarpugut. Inuk immikkoorluinnartuuvoq. Allanut sanilliullugu tunniutiinnarusunneq ajortoq. Taamaakkaluartoq qanoq inissittarnera nalornisigineqarneq ajorpoq.
Naalakkersusut siulittaasuat, Kuupik Kleist, sisamanngornermi ualikkut inunnik isumaginninnermi siunnersortip, oqalliseqataasartup, tusagassiortup, atuakkiortup allanillu suliar´qartarnikup Tine Bryld-ip ilisaanerani Naalakkersuisut siulittaasuat, Kuupik Kleist, taamatut oqaluttuarpoq. Inuk, suliaminnut atatillugu inuttullu Kuupik Kleist-ip nalungisaa.
Det Nordre Kapel-imi inerujussuaq Vestre kirkegård-imiittoq inunnik kingullermik ilassinninniartunik ulikkaavippoq. Naasummi iliseqataasullu ilaat ilisiffiup silataaniiginnartariaqarlutik.
Ilisiffiup iluani christianiamioq Jørgen Tulipan ilerrup eqqaani qeqarpoq, Christianiap erfalasua kingusinnerusukkut ilaqutariinnut tunngiunneqartussaq tigummiarlugu. Periuseq oqaatsinit paasinarnerusoq. Tine Bryld sanngiitsut ikiortigalugulu oqaaseqartartoraat. Ilisinermilumi Danmarkimi pisortat nuimasunik sinniisoqanngillat.
Tusaamasanik nuimasunik takkuttoqangaarnavianngilaq, Se & Hør-imi assiliisartoq kiaap ataani anertikkartuinnaalluni oqarpoq, TV2-lumi tusagasiuuteqarfinni elektronisk-iusuni kisiartaavoq.
Inuit 350-it iliseqataapput
Taamaakkaluartoq iliseqataasunit 350-init Tine Bryld-ip meerai pingasut Esben, Iben aamma Lea, asannittumik kissartumik ilassiorneqarput. Palaseqarani eqqaaniaanerummat paniata Lea-p anaanani eqqartorlugu oqalugiarpoq.
Tassalu Naalakkersuisut siulittaasuat Kuupik Kleist aamma peqataanissaminut piffissaqartissimavoq. Kalaalerpassuit allat peqatigalugit. Taakkununnga ilaavoq inunnik arfineq marlunnik toqutsinikoq Abel Klemensen, naasunik Kalaallillu erfalasuanik nassarluni peqataasoq. Tine Bryld-ip sunniuteqarfii assigiinngitsorpassuupput. Inuppassuit atassuteqarfigiuarsimavaat. Inuit nalinginnaat nuimasullu.
Inuppassuit akornanni takussaavoq Helene Thiesen, ungasinngitsukkut atuakkiaminik ”For flid og god opførsel”-imik saqqummeeqqammersoq. Kalaallit Illuutaanni sulisut sisamat peqataapput. Tine Bryld-imi Herstedvester-imi kalaallinut paarnaarussanut atassuteqartartuunini tunniusimalluni ingerlannikuuaa.
Ujartuilluni inunnik isumaginninnermik sulialik Agga Petersen aamma Joori Johansen Frederiksberg Centret-imeersoq aamma peqataapput. Kiisalu Kofoed Skole-mi ilinniartut atorfillillu aamma peqataallutik.
Ilerra Nannup amianik toqqaveqarpoq
Ilerrup qaqortup nannup amia toqqavigaa. Tassanngaanniillu silammut naasorpassuaqarluni. Oqalugiartoqartarlunilu nipilersortoqarpoq. Tine Bryld-illu tusarnaaqataaguni tusaasimassavaa apnini Lea ilaatigut imatut oqartoq:
- Inuunerit tamaat inoqativit ilaasa pinngitsoorsinnaajunnaarnissaat pinaveersaartuarsimavat. Napparsimaleravilli tamanna saneqqussinnaajunnaarpat. Taamatulluunniilli inissisimaleraluaravit, naaggaarsinnaatitaanerit erseqqissarpat. Akersuutipilooqaatit. Nappaateqalernerpilli tamatta immitsinnut aatsaat taama qanitsigilersippaatigut.
- Ulloq taanna qaratsakkut aanaartooravit uagut meeraasugut oqaluuseraarput, toquguit qanoq misigissanerluta. Soorunami assut aliasukkumaarluta isumaqatigiippugut. Aammali nalunngilarput, oqaluttuarisassat tamarmik oqaluttuarineqareersut. Maannakkullu uagut inuunerput ingerlateqqissavarput. Nunarsuatsini pitsaanerusumik atugassaqartoqalernissaa sorsuutigalugu. Soorlu illit taamaaliortuarsimasutit, Lea, nipaarutitsiartarluni oqalugiarnermini ilaatigut oqarpoq.