Kuupik ’Deadline’-mi tatineqartoq
Naalakkersuisut siulittaasuat Kuupik Kleist pingasunngornermi naalakkersuisut aatsitassanut politikkiat illersoramiuk malunnartumik tatineqarpasippoq
- Kalaallit Nunaat uuliasioqatigiiffinnit aatsitassarsioqatigiiffinnillu sinenqartoorutiminnik nunani akileraarutikinneruffiusuni pasinapiluttuni toqqortaqartartunit uukapaatinneqassava?
DR2-mi Deadlinemi aqutsisup Martin Breumip pingasunngornermi unnukkut naalakkersuisut siulittaasuat Kuupik Kleist, Inuit Ataqatigiit, sivisujaamik apeqqarissaarfigigamiuk tamanna apeqqutitut qitiusutut akineqaqquaa.
Aallakaatitarlu sioqqullugu aallakaatitassiap allaaserineqarnerani siunniuneqaraluartutut apeqqut toqqaannartumik apeqqutigineqanngisaannaraluartoq assersuutigalugu London Miningip Naalakkersuisunit aqunneqarsinnaanera Kuupik Kleistip imminut illersorpasissup arlaleriarluni erseqqissaatigisarpaa.
Martin Breum: - London Miningip nunarsuarmi ingerlatseqatigiiffiutaanik tamanik takunnissinnaanissamik piumasaqarnissaq ilissi (Naalakkersuisut, aaqq.) eqqarsaatigisimavisiuk, suliffeqarfissuaq sinneqartoorutinik ingerlatseqatigiiffimmit ataatsimit ingerlatseqatigiiffimmut allamut nuussisannginniassammat? Imaluunniit tamanna qanoq iliuuseqarfiginiarpiuk?
Kuupik Kleist: - Pissutsit imaapput pissutsinik Kalaallit Nunaannut tunngasuinnarnik nunamilu maani ingerlatarineqartunik taamaallaat killilersuisinnaalluta. Kisianni pissutsit nakkarfiusinnaasullu eqqumaffigilluinnarpavut. Isumaqarpunga aaqqissuussinermi matumani tamarmi Torben M. Andersenip (Kalaallit Nunaanni Aningaasaqarnermut Siunnersuisoqatigiit, aaqq.) eqqaasai isiginiarneqartariaqartut, tassalu Kalaallit Nunaat aningaasarsiornikkut ingerlatanik aallartitsinissamut annertoorujussuarmik pinasuartumillu pisariaqartitsisoq suliffissaqartitsineq, inuuniarneq akuersaarneqarsinnaasoq attatiinnarneqarsinnaaqqullugit, kiisalu Kalaallit Nunaanni pisuussutit uumassusillit pisariaqanngitsumik artukkerneqannginnissaat.
Læs "Kuupik, bliver der tyveri af Grønland?"
Læs "Stort flertal: Vi går glip af gevinst fra råstoffer"
- Tamannalu aallaqqaammut aallaaviuvoq. Isumaqartoqarpallu Naalakkersuisut uukapaatitsiniarlutik tamakkuninnga suliaqartut taava kukkusoqarsimassaaq. Pingaartumik Kalaallit Nunaanni inuiaqatigiit eqqanaarniarlugit sapinngisarput tamaat iliuuseqarpugut. Nakkutilliineq annertoorujussuaq pisariaqartoq isumagisinnaajumallugu avataaniit ikiorteqassaagut, tamatumalu peqatigisaanik pisariaqartumik siunnersorteqarluta, Kuupik Kleist akivoq.
Aallakaatitami Kalaallit Nunaat pillugu ilanngutassiaq minutsinik 16-inik sivisussusilik Kalaallit Nunaanni Aningaasaqarnermut Siunnersuisoqatigiit siulittaasuata Torben M. Andersenip IBIS-imilu aningaasaqarnermut siunnersuisup Lars Kochip peqataaffigisaat takuuk imaluunniit takoqqiguk. Kuupik Kleistip apeqqarissaarfigineqarnera minutsit arfinillit missaannik sivisussuseqarpoq.
Naalakkersuisut siulittaasuat Kuupik Kleist Deadlinemi qanoq ingerlanersoq isumaqarpit? Apeqqutigineqartut isorinnippaluttut akivai imaluunniit avaqqutaariva? Aatsaat taamaa tatineqarpasitsigaa?