Kuupik Gen
Naalakkersuisut siulittaasuat Kuupik Kleist Nunatta Namminersornera FN-imi oqalugiaatigaa.
Naalakkersuisut siulittaasuat Nunap Inoqqaavisa Piginnaatitaaffii pillugit Immikkut Ilisimasallit Suliaasa Aappassaaneerneqarnerannut atatillugu FN-imi oqalugiarpoq. Tamanna Genevèmi pivoq marlunngornermi aggustip aqqarngani.
– Naalakkersuisut siulittaasuata erseqqissarpaa namminersornikkut Nunap Inoqqaavisa Piginnaatitaaffiinik atuutsitsinissaq matumani pisussanngussasoq, aammali Kalaallit Nunaata iluani atuutsitsiartuaarneq ingerlatiinnarneqassasoq, taamatut Nunanut allanut pisortaqarfik tusagassiuutitigut nalunaaruteqarpoq.
FN-ip Inuit Piginnaatitaaffii pillugit Siunnersuisoqatigiivisa 2008-mi decemberimi Immikkut Ilisimasalinnik Siunnersuisoqalernissaq akuersissutigaat apeqqutit nunap inoqqaavisa piginnaatitaaffiinut tunngasut pineqartillugit immikkut tamatumunnga siunnersuisoqalernissaa siunertaralugu, tassunga ilanngullugit FN-ip Nunap Inoqqaavisa Piginnaatitaaffii pillugit Innersuussutaasa atuutsinneqarnissaannut tunngasut.
– Kalaallit Inuiaat Nunarsuarmi inuiaat inatsisitigut illersugaasut assigalugit, tassunga ilanngullugu nammineq aalajangiisinnaatitaanissamut, Kalaallit Nunaatalu pisuussutaanik atuinissamut piginnaatitaaffeqarneq kalaallillu oqaasiisa pisortatigoortumik atugaanissaasa akuerisaanissaat, tassaapput innersuussutit atuutsinneqartussat pingaarnerpaat ilaat, taamaattumik Kalaallit Nunaata ineriartornera angusarisaalu pillugit annertuumik nunap inoqqaavisa akornanni soqutigineqartorujussuuvoq, Nunanut allanut pisortaqarfik ilisimatitsivoq.