Kuupik: – Ilumut, ataatsimiinneq pingaarpoq
Hillary Clintonip nunarput 2012-imi tikeraassavaa.
Naalakkersuisut siulittaasuata Kuupik Kleistip Inuit Ataqatigiinneersut USA-mi nunanut allanut ministeri Hillary Clinton Norgellu nunanut allanut ministeria Jonas Gahr Støre isumaqatigai:
– Nunat tallimat issittumut killeqarfillit Canadami ataatsimiinnerat pingaartuuvoq!
Taamaalilluni aamma Kuupik Kleistip qallunaat nunanut allanut ministeria Lene Espersen Det konservative Folkepartimeersoq nunat issittumut toqqaannartumik killeqarfillit nunanut allanut ministeriisa ataatsimeeqatiginissaanniit Mallorcami ilaquttanilu feeriarnissamik pingaartitsinerusoq isumaqatiginngilaa.
– Lene Espersenip peqataannginneratigut illit kalaallit isumaasa soqutigisaasalu saqqummiunnissaannut periarfissaqarnerulerpit?
– Lene Espersen peqataasimasuuppat qanoq pisoqarsimassanersoq naliliiffigisinnaanngilara, Kuupik Kleist Sermitsiaq.AG.mut oqarpoq, periarfissaqarsimavungali nerrivimmi ataatsimeeqataasunut issittumi nunanut allanut ministerit allat kalaallit isumaasa saqqummiunnissaanut.
Kuupik Kleistilli aamma erseqqissarpaa, Lene Espersenip taartigisaanik inatsisinik atortitsinermut ministerimik Lars Barfoedemik Det KOnservative Folkepartimeersumik suleqateqarluarsimalluni.
Kuupik Kleistip Hillary Clintonip ilassinissaannut periarfissaqarsimavoq: – Siullersaallunga ilassivaanga, aamma nalunngilaa kinaasunga.
Kleist aamma Clinton vCanadamiunut qaaqqusisunut isornartorsiuipput, nunat tallimat issittumut kileqarfeqartut taamaallaat tallimat Rusland, USA, Canada, Danmark aamma Norge qaaqqusimammagit, nunallu pingasut allat Island, Sverige aamma Finland kiisalu nunap inoqqaavi Issittumi Isumasioqatigiinnut ilaasortaasut qaaqqunagit.
Hillary Clinton Kuupik Kleistimut oqarpoq, Kalaallit Nunaat tikeraarusullugu, periarfissaavorlu 2012-mi nunatsinni Issittumik Isumasioqatigiit ministeriisa naapinneranni Amerikamiut tikeraarnissaat.