Kuupik: Kalaallit Nunaat immikkut ittuunngilaq
Naalakkersuisut siulittaasuata Kalaallit Nunaat silap pissusai pillugit oqallinnermi immikkut pineqassannginnerarpaa. - Nunatut uuliamik tunisassiortutut allatuuli pinqarumavugut, Kuupik Kleist ataasinngormat unnukkut DR2-mi Deadlinemut oqarpoq.
Naalakkersuisut siulittaasuata issittuni avatangiisit mianersuuttariaqarnerat pissutigalugu Kalaallit Nunaaa immikkut ittutut isigineqarnissaa akueriumanngilaa.
– Silarsuup sinnreanut sanilliulluta uagut immikkut ittuunngilagut, taamaallaat silap pissusaasa allanngornerat nunatsinni malunnartorujusuuinnarpoq. Uagummi allatuulli takorluugaqarlutalu anguniagaqarpugut aningaasaqarnikkullu nammineerusulluta, inuuniarnikkut naammaginartunik atugaqarumalluta, Kuupik Kleist ataasinngormat unnukkut tv-kut aallatittakkamut Deadlinemut DR2-meersumut oqarpoq.
Kuupik Kleistillu aamma, kikkut tamarmik Kalaallit Nunaattuulli pineqassappata, kalaallittaaq CO2-mut akileeqataajumanerarpai.
– Ullumikkut silarsuarmi oqimaaqatigiinnginneq, aamma Bella Centerimi assortuunnikkut ersertoq, tassaavoq oqimaaqatigiinnginneq uanga tikkuagara: Arlaannik allaninngaanniit qaffasinnerusutut inissisimasoqarnera. Ilaat ukiorpassuarni uuliamik tunisassiorsimapput isumaqarlutillu namminneq taamaattuartariaqarlutik, nutaalli soorlu Kalaallit Nunaat aallartiinnarlutilli aningaasartuuteqartinneqassapput taamaalillutalu unammilleqatigiinnermi Danmarkimiit, Norgemiit Saudi-Arabiamillu pitsaannginnerusumik inissisimalereerpugut, Kuupik Kleist erseqqissaavoq.
Ataasinngormat silap pissusaanut nukissiornermullu ministerimik Lykke Friis-imik ataatsimeeqateqarsimanini 'ajunngitsorujussuunerarpaa'.
– Angorusutarput qanilliallattorujussuuarput. Imaappoq tunngaviatigut silarsuup sinneranut naligiissinneqarpugut, Danmarkimullu sanilliulluta silap pissusaasigut anguniakkagut erseqqissaatigaagut, Kuupik Kleist oqarpoq itisilerillunilu:
_ Kalaallit Nunaat Damarkiminngaanniit allaanerujussuuvoq, taamaattumillu aamma uagut nammineq pisariaqartitagut aallaavigisariaqarpagut.
Kalaallit Nunaanni tv-mik isiginnaartartut Kuupik Kleistip Deadlinemiinnera KNR-TV-kut nunatsinni nalunaaqutaq malillugit 22.05 takusinnaavaat.