Kuupik Kleist: Apeqqutit pingaarnerit isumaqatigiissutigineqarput
Inatsisartut ataatsimiinnerat ammarlugu oqallinnerat sivisooq naalakkersuisut siulittaasuata naammagisimaarpaa.
Inatsisartut ukiaanerani ataatsimiinnerannik ammaaalluni oqallinneq Naalakkkersuisut siulittaasuata Kuupik Kleistip iluarisimaarpaa.
- Ineriartornerup sammivissaa annertuumik isumaqatigiissutigaarput, Kuupik Kleist inerniliivoq.
Kuupik Kleistip tikkuarpaa, namminersornerup timitalersornissaanut isumaqatigiissutigineqarluartoq. Aalisarnermik aaqqissuusseqqittariaqarneq isumaqatigiissutaavoq. Peqqinnissaqarfimmi iliuuseriniakkat apeqqusersorneqanngitsut. Kiisalu amerlanerusunik attartortakkanik inissialiortoqarnissaa isumaqataaffigineqartoq.
- Tassa pingaarutillit annertuut Inatsisartuni ataatsimoorfiusinnaasutut isikkoqarput, Kuupik Kleist oqarpoq.
Kisianni nunaqarfiit siunissaat illuatungiliuttunit isumakuluutigineqarpoq, nunaqarfinni ingerlatsinermut sanaartornermullu aningaasaliissutigineqartartut ikilineqassasut, aningaasanut inatisisissatut siunnersuummi siunnersuutaammat. Nunaqarfimmiut ajornartorsiornerulissasut, illuatungiliuttut isumaqarput. Kuupik Kleistili taama isumqanngilaq.
- Neriuppunga, isumakuluutit taakkua ataatsimiinnerup matuma ingerlanerani qaangerniarsinnaallutigit. Aningaasaliissutit taakkua peerneqanngillat, aningaasaleeriatsimilli allaannerusumik siunnersuuteqarpugut. Assersuutigalugu sanaassat ataasiakkaarlugit aningaasaliiffiginagit, ataatsimoortumilli aningaasaliiffigineqassasut, kiisalu tunisassiorneq tunitsiveqarnerlu eqqarsaatigalugit ataatsimoortumit aningaasaliissutissanik Inatsisartunut qinnuteqarpugut. Tassa ilaatigut annertusaanermik ilaatigullu aamma naammassineqarsinnaasut toqqammavigalugit aningaasaliinissamik siunnerfeqarpugut, Kuupik Kleist oqarpoq.