Kuupik Maliinalu Issittoq pillugu ataatsimiigiassapput
Kuupik Kleist aamma Maliina Abelsen Københavnimi Arctic Funders Meetingimi ataatsimiissapput.
Naalakkersuisut siulittaasuat Kuupik Kleist isumaginninnermullu naalakkersuisoq Maliina Abelsen IA-meersut ullumi pingasunngornermi nunat tamat akornanni aningaasaateqarfiit Issittumik soqutigisaqartut ataatsimiinneranni peqataassapput.
Ataatsimiinneq Københavnimiissaaq tassani aningaasaateqarfiit aqqaneq marluk siulersuisui ataatsimiissallutik. Ilaatigut peqataassapput aningaasaateqarfiit soorlu Oak Foundation, Prins Albert den 2. af Monacop aningaasaateqarfia, Åge V Jensenip aningaasaateqarfia kiisalu Veluxip aningaasaateqarfii.
Kuupik Kleistip oqalugiaataani takuneqarsinnavoq siulittaasoq ullumikkut siusinnerusukkut nunatsinni suliassat annertuut takkukkaluttuartut eqqartorpai . nunarpullu inuiaqatigiit ineriartorneranni peqataasariaqartoq:
- Kalaallit Nunaanni Naalakkersuisut allanngortitsiniarnerminni ilisimaaraat ajornartorsiutit sorlaallusooq tikillugu iliuuseqartoqartariaqarnera. Tamatuma saniatigut suut tamarmik imminnut ataqatigiinnerat paasillugu sapinngisarput tamaat naapertorlugu ataqatigiissitsiniarluta sulivugut pilersaarusiorniarlutalu, Kuupik Kleist oqalugiarnermini ilaatigut taama oqaaseqarpoq.