Kuupik naalakkersuisunut siulittaasunngorpoq
Inatsisartunut ilaasortat 21-it Kuupik Kleist Hans Enoksenip, Siumut, naalakkersuisunut siulittaasutut kingoraartissaatut tikkuarpaat.
Naalakkersuisut siulittaasuannik nutaamik qinersinermi illua'tungiliuttut avissimapput. Siumup Kuupik Kleist taajumanngilaa, Atassutip taajumagaa.
Akerlianik naalakkersuisunut ilaasortat sinneri Siumup Atassutillu taarusunngilaat.
Kuupik Kleist 30-init 21-inik qinerneqarpoq. Qulingiluat isumaqataallutik isumaqataanatilluunniit taasipput, ataaserlu taasinani.
Naalakkersuisunut ilaasortat arfineq-pingasut qinerneqarput 18-inik akuerineqarlutik, 12-nillu akerlilerneqarlutik.
Siumup siulittaasortaavata Aleqa Hammondip tunngaviit arlallit tikkuarpai, partiip naalakkersuisunut ilaasortassatut siunnersuutigineqartunik taaserusunnginneranut.
Pingaarnerusutut tikkuarpaa innuttaasunik taasisitsinissaq sioqqullugu Demokraatit Namminersornermut akerliunerat, kiisalu naalakkersuisooqatigiit meeqqanut ileqqaartitsinermik isumaqatigiissut atorunnaarsinniarmassuk, Siumup Atassutillu 2005-2006-imi atuutilersitaat.
Tamatuma saniatigut Siumup siulittaasuata tikkuarpaa aningaasaqarnermut naalakkersuisunngortussaq Palle Christiansen (Demokraatit) nassuersimasoq malittarisassat unioqqutillugit inatsisartut ataatsimiittarfianni alla sinnerlugu taasisimalluni, kiisalu Anthon Frederiksenip (Kattusseqatigiit Partiiat), nunap iluani pissutsinut naalakkersuisutut siunnersuutigineqartup, isummani allanngortissimagaa maannalu naalakkersuisuni, avataaneersumik naalakkerlsuisunut ilaasortanngortitsisuni, naalakkersuisooqataalerluni.
Kiisalu Aleqa Hammondip isornartorsiorpaa partiini, qinersinermi qinersisartut 26 procentiannik tapersersorneqartoq, naalakkersuisunik nutaanik pilersitsinissamik isumaqatigiinniarnerni mattunneqarsimanera.