Kuupik: OLT-mi nunat ilaqutariiupput assigiinngeqisut
Naalakkersuisut siulittaasuat ukiumoortumik OLT pillugu ataatsimeeqataavoq, ilaatigut eqqartorneqarluni OLT-mi nunat EU-mut akileraarutinik isumaqatigiissuteqaannarnissaasa pingaaruteqarnerat.
Nunat OLT-mut ilaasut, EU Kommissioni aamma naalagaaffiit EU-mi ilaasortaasut sisamat – Danmark, Frankrig, Storbritannien aamma Holland - ulluni 24.-26. marts ukiumoortumik OLT-mi ataatsimiittarnerit ingerlappaat. Ministerit ataatsimiinnerat, peqatigiillu pingasut nunat OLT-mut ilaasut, naalagaaffiit EU-mi ilaasortaasut aamma EU Kommissioni ataatsimiinnerat ingerlanneqarput.
- Ilaqutariiuvugut assigiinngiiaassuseqaqisut ataatsimoorussarpassuallilli - tamatta qeqertaavugut EU-p ungataaniittut naalagaafiit ilaasortaaffigisatsinnut EU-mullu naleqqiullugu innuttakitsunnguit, Kuupik Kleist oqalugiarnermini ilaatigut taama oqarpoq.
Naalakkersuisut Siulittaasuata ilanngullugu ersersinniarpaa OLT-mi sulinermi avatangiisit silallu pissusaata allanngoriartornerata sammineqarnissaat pisariaqartinneqartoq. Aamma innersuussutigaa siunissami EU-mut attaveqarneq pillugu isumaqatigiinniarnissanut iliuusissat sulissutigineqarnissaat nunanut OLT-mut ilaasunut.
Kuupik Kleist angalaqatigiinnut siuttuuvoq aammalu Ny Kaledoniep Præsidentianik Philip Gomez 2010-mi nunat OLT-mut ilaasut siulittaasoqarfiannik akisussaalersumik naapeqateqarluni. Taassuma saniatigut Kuupik Kleistip naapippaa Ineriartortitsinermut kommissæri Andris Piebalgs.
Ineriartortitsinermut kommissærimik Andris Piebalgs-imik ataatsimeeqateqarnermini Kuupik Kleistip pingaartutut oqaatigaa nunat killeqarfii aallaavigalugit akitsuusiisarnerit eqqarsaatigalugit nunat OLT-mi ilaasut EU-mi niuerfinnut ungasinnerujussuat pissutigalugu immikkut salliutitaanerisa attatiinnarneqarnissaa pisariaqartoq. Isumaqatigiissut 2013-imi naassammat isumaqatiginninniutigeqqinneqartussaavoq.