Kuupik: Sipaassaagut
Naalakkersuisut siulittaasuata ivertinneqarluni oqalugiarnermini erseqqissarpaa kissaatigisanut tamanut akissaqanngitsoq. Pisariaqarnerpaat siulliunneqassapput.
Kikkunnut tamanut inuuniarnerni atugassarisanik pitsaanerusunik pilersitsinissamik naalakkersuisut nutaat isumalluarfigineqartorujussuugaluarput inuiaqatigiit naammagittartariaqarput. Tassami Kalaallit Nunaata aningaasarsiornikkut inissisimanera pissutigalugu aningaasaqarneq sakkortuumik aqunneqassaaq annertusaarisoqartariaqarlunilu. Taamatut oqarpoq naalakkersuisut siulittaasuat Kuupik Kleist, Inatsisartut oqaluttuarfiannit ivertinneqarnermini oqalugiarami.
Taassuma neriorsuutigaa Naalakkersuisut inuiaqatigiinni sanngiinnerpaat siulliullugit ikiorniarneqassasut. Qularutiginngilaalu Inatsisartunut ilaasortat nutaat tamarmik qinigaasimasut, pissutigalugu innuttaasut isigigamikkit Kalaallit Nunaanni Namminersornermik eqqussisussatut naleqqunnerpaatut.
"Inuit qinigaattut assigiinngitsorpassuarnik tunuliaqutaqarlutalu piginnaasaqarpugut: Aalisartuuvugut, piniartuuvugut, politiiuvugut, inuussutissarsiortuuvugut namminersortut, pisortani suliffeqarpugut, akademikeriuvugut, ilinniarsimasuunngilagu ilinniagaqartuullutalu: Aamma angajoqqaajuvugut, angajoqqaajunngilagut, naartusuuvugut aanakkut/aatakkuullutalu. Maani inoqarpoq oqaatsinik arlalissuarnik sapigaqanngitsunik aammalu maani inoqarpoq namminneq oqaatsiminnik piginnaaneqarluartunik. Tamatta maaniippugut inuiaqatigiit pitsaanerpaamik sullikkumallugit, qanorluunniit piginnaasaqaraluarutta misilittagaqaraluaruttalu – tassa imaappoq, Kalaallit Nunaanni innuttaasut sutigut tamatigut tarrarsorfigisinnaavaatigut. Tassa Kalaallit Nunaat ullumikkut. Tassa kalaallit inuiaqatigiit ukioq 2009-mi – Namminersulersut!" Kuupik Kleist oqalugiarnermini oqarpoq.
Qullissanitut
– Namminersornermut aqqut Namminersornerunerup eqqunnissaata tungaanut piffimmut eqqaanartorujussuuvoq, Kuupik Kleist nangippoq. Tamatumanilu illoqarfik inunngorfini eqqarsaatigaa, Qullissat, aamaruutissarsiorfik, 1973-imi matuneqartoq inerutsinneqarlunilu. Pisimasoq tamanna innuttaasuni politikkikkut sianissutsimik nutaamik pilersitsisoq.
"Isumaqarpunga ukiut Namminersorneruleriartornermut atorsimasavut Namminersuleriartornitsinnut assigiissuteqartut. Politikkikkut nutaamik eqeersimaalerneq, nunaqarfiit pillugit oqallinneq, nammineerluni aalajangeerusussuseqarneruneq, kulturikkut tanrikkullu nukittorsartariaqarnermik misigisimaneq aammalu inuiattut makeqqinnissamik piumasaqaat, isumaga malillugu paatsoorneqarsinnaanngillat.
Qulissat inerutsitaanerat neriunnermik piumassuseqarnermillu allamik pilersitsivoq. Qullissat qaminneqarnerat qaamanermik neriunnermillu nutaamik ikitsineruvoq."
Enoksenimut immikkut qujanaq
Oqalugiarnermi naggataani Kuupik Kleistip naalakkersuisut siulittaasuattut kingoraakkani Hans Enoksen, Siumut, immikkut qutsavigaa. Qanittukkut TV-kut aallakaatitassiami Hans Enoksen kaammattuivoq imminut nikanarsartarneq unitseqqullugu taarsiullugulu oqaatsit akimorlugit suleqatigiittoqarluni. Oqaaseqaatit Kuupik Kleistip killitsissutigisorujussuusimavai.
– Oqaatsinut taakkununnga qujanaq, Kuupik Kleist oqaluttarfimmit oqarpoq.
Kuupik Kleistip oqalugiarnera spaltemi talerperlermi download-eruk atuarlugulu.