Laila Motzfelditp sungiusarneq nakorsaatitut atorniarpaa

Laila Motzfeldt 27-nik ukioqarpoq Qaqortumilu inunngorsimalluni. Inuunermini ukiut arfineq-pingasut siulliit Narsap Kommunerisimassata kangimut kujataaniittumi savaateqarfimmi Timerlerni alliartorsimavoq. Tamatuma kingorna Qaqortumut nuussimavoq, tassanilu meeqqat atuarfianni Ilinniarnertuunngorniarfimmilu atuarnini naammassisimallugit.

Laila Motzfeldtimut timersortuaannarsimasumut Syddansk Universitetimi Idræt og Sundhed-imik ilinnialernissamik aallartitsinissap toqqarnissaa ajornanngitsuaraasimavoq. Bachelorinngorniut tunniunneqarsimavoq, 2020-milu bachelorinngorluni.

- Bachelorinngorama qularutigisimanngilara kandidatitut ilinniarnissara. Sumulli ingerlariaqqissanerlunga qularutigisimavara. Tamanna eqqarsaatigisarsimaqaara, Laila Motzfeldt Odensemiittumi Nordatlantisk Husimi apersorneqarami oqaluttuarpoq.

- Timersornerup tungaasigut ilinniagaqarnissannit nakorsatut ilinniarusunnerullunga nalunngilara. Exercise as Medicin (sungiusarneq nakorsaatitut) ilinniagaqassallunga paasivara. Periarfissatummi nutaatut taanna takkussimavoq.

- Tamanna peqqissimissutigisimanngilara. Siunnerfik soqutiginartupilussuuvoq, pitsaanerusumik inuuneqalernissamut aamma sungiusarluni nappaatit qanoq qaangerneqarsinnaanerat eqqarsaatigalugit assigiinngitsorpassuit aqqusaarsimavagut.

Ilinniarnermik unitsitsigallarneq iluaqutaasimaqisoq

- SDU-mit ukioq ataaseq unitsitsigallarnerma nukissanik nutaanik tunisimavaanga, tamannalu iluaqutigisimaqaara. Sumik ilinniagaqarniarnerluni ilisimanngivikkaanni eqqarsarniarluni unikkallarneq iluaqutaasaqaaq, Laila Motzfeldt nassuiaavoq.

Laila Motfeldt sumut ingerlaqqissanerluni eqqarsaateqarnermini Nuummi sunngiffimmi siunnersortitut sulisimavoq.

Ilinniagaqartunit 150-iusuni 15-iinnaat Exercise as Medicinimik ilinniagaqartuupput. Oqaatigineqareersutut siunnerfik nutaarluinnaavoq. Tassani ilaatigut internet aqqutigalugu assersuutigalugu Australiami USA-miluunniit ilisimatuut ilinniartitsillutik oqalugiarnerpassui ingerlanneqartarput. Ilinniakkamut atatillu nunarpassuit Danmarkimit siuarsimanerupput.

Ilinniartitsinerit annersaat tuluttut ingerlanneqartarput. tamanna soorunami unammillernarsinnaasarpoq.

- Ilaannikkut allatakka takugaangakkit tuluttut danskisullu akuleriaattut takusarpakka, kalaallisullu eqqarsartartuulluni tamanna unammillernarsinnaasarluni, Laila Motzfeldt ilinniagassutut toqqarsimasaminik nuannaarutiginnittoq qungujulalluni oqaluttuarpoq.

Ilinniarnerup ilaa Rigshospitalimiittumi Center for Aktiv Sundhedimi ingerlanneqartarpoq, tassani ataavartumik nappaatigineqartartunut, soorlu type 2-diabetesimut, uummatip taqarsuatigut nappaatinut, kræftit ilaannut pualluutinullu atatillugit timikkut sungiusartarnissaq siunnerfigalugu suliaqartoqartarluni.

Nuummi immikkut allaaserisassaq suliarineqassasoq

Ilinniarnermut atatillugu immikkut allaaserisassaq januaarimi aallartissavaa, Laila Motzfeldtillu sumik suliaqassanerluni sumillu misissuissanerluni nalunngilaa.

MODY diabetes, sananeqaatikkut allanngortoqarneranik pissuteqartumik sukkornermik nappaat kingornunneqarsinnaasoq qaqutigoortupilussuarlu Laila Motzfeldtip allaaseriniarpaa. Sumik pissuteqarnersumik takuneqarsinnaavoq, nunanut allanut sanilliullugu Kalaallit Nunaanni qaqutigoorluinnartumik taamatut nappaateqartut amerlanerorpasipput.

- Tamanna siusinnerusukkut misissuiffigineqarsimanngisaannarpoq, Lail Motzfeldt nassuiaavoq.

- Misissuininni MODY-mi nappaatillit atussavakka, misissuininnullu peqataasut sungiusarnerisa sunniutai misissortassallugit. Misissuinikka Nuummi ingerlanneqassapput.

Universitetimi ilinniareeruni siunnissaa

Laila Motzfeldtip kandidatitut naammassinermi kinorna Kalaallit Nunaannut uteruni allannguisinnaanini takorloorpaa. Taamanikkussamut visitkortiani Cand.scient i Idræt og Sundhed allassimasusaavoq.

- Piffissaq ungasinnerusoq eqqarsaatigalugu nammineq nakorsiartarfiuteqarnissara aamma allatut ilinniarsimasut, soorlu nakorsat, peqqissaasut, timimik sungiusaasut peqqissutsimut tunngatillugu suleqatigisarnissai takorluugaraara, anguniagaqarluartoq Laila Motzfeldt naggasiivoq.