Lars-Emil: K. Jeremiassen kukkuvutit

Siumumit Lars-Emil Johansenip paasisinnaanngilaa sooq Kristian Jeremiasseni Inatsisartunut siunersuuteqaleraangami kalaallisuinnaq allattalerniarnersoq.

Nukissiorfiit namminersortunngorsarnissaannik Siumumeersup Kristian Jeremiassenip siunnersuutaa Inatsisatut upernaamut katersorneranni oqaluuserineqassanngilaq. Inatsisartut allattoqarfiat oqaluuserisassanut ilanngunnissaanut itigartitsivoq qallunaatoortaa kukkuneqarmat, Sermitsiaq.AG-mi pingasunngormat saqqummiunneqarpoq.

Itigartitsinermut tunngavilersuutaavoq siunnersuutip atuutilerfissaatut ulloq kalaallisuuani taamaallaat allassimammat.

Inatsisartuni siulittaasoq: Kukkuvutit
Kristian Jeremiassen Inatsisartut Siulittaasoqarfianni ilaasortaavoq, Inatsisartut siulittaasuata Kristian Jeremiassenip Sermitsiaq.AG-mut oqaatigisai tupinnartoqartipai.

- Taamaalillunga Kristian Jeremiassenimut eqqaasitsissutigisariaqarpara nammineq Siulittaasoqarfimmut ilaasortatut ippassaq Siulittaasoqarfiup sivisuumik ataatsimiinneranut peqataammat, tassanilu isumaqatigiissutigineqarlunilu aalajangerneqarluni, ilaatigut namminerminit siunnersuut matumani eqqartorneqartoq, upernaakkut ataatsimiinnermi oqaluuserisassanut ilanngunneqarsinnaanngitsoq.

- Taamatulli aalajangermut pissutaasut siunnersuutip kalaallisuuata qallunaatuuatalu taasissutissartaasa akornanni assigiinngissuteqalaarneranit annertunerujussuupput, Lars-Emil Johansen nassuiaavoq.

Itigartitsinermut tunngaviusut arlaqartut
- Tamatumunnga atatillugu immikkut oqaatigineqarpoq siunnersuutip akuerineqaruni aningaasatigut kingunerisassai siunnersuummi sukumiinerusumik nassuiarniarneqarsimanngitsut, taamatullu aamma nalilerneqarluni siunnersuummik massakkut saqqummiussaqarneq piffissaq eqqarsaatigalugu pissusissamisoortutut isigineqanngitsoq, tassami ilisimaneqarmat sammisaq tamannarpiaq pillugu nassuiaammik annertuumik upernaakkut ataatsimiinnermut agguaassaqartoqartussaasoq, taamaattumillu pissusissamisoortutut isigineqarluni nassuiaatip ataatsimiititaliami nalilersorneqaqqaarnissaa utaqqimaarneqarpat.

- Taamatut naliliineq aalajangiinerlu tamanit isumaqatigineqarpoq, taamaattumillu assut ajuusaarnarluni takullugu taamatut aalajangernermiit ulloq ataaseq qaangiutiinnartoq aalajangernerup qimarratiginiarneqarnera, Lars-Emil Johansen tusagassiutinut nalunaarummi oqarpoq.

- Sulilu pissutsit ajuusarnarneruliinnarput peqatigitillugu takusinnaagakku Siulittaasoqarfimmut ilaasortap ammasumik nalunaarutigimmagu siunnersuuteqarnermut atatillugu ilusissanut piumasaqaatit ilaat malinniarnagit, naak Siulittaasoqarfiup suliassaasa pingaarnerpaat ilagigaluaraat taakku eqquutsinneqarnissaasa qularnaarneqarnissaat.

Oqaaseqaatini eqqarsaatigeqqittariaqarai
Lars-Emil Johansenip nassuiarpaa Inatsisartut Siulittaasoqarfianni ilaasortat Inatsisartuni ilaasortat pillugit sulisuusut

- Siulittaasoqarfik Inatsisartut tamaasa sinnerlugit sulivoq, tamannalu immini aamma isumaqarpoq Siulittaasoqarfimmut ilaasortatut ilaannikkut inuttut nammineq soqutigisat tunulliunneqartariaqartarmata. Tamannali ajuusaarnaraluartumik matumani pisimanngilaq.

- Tamanna tunngavigalugu Kristian Jeremiassen kaammattuinnarsinnaavara oqaaseqaatigisimasami eqqarsaatigeqqinnissaanut, Lars-Emil Johansen oqarpoq.

Kristian Jeremiassen oqaaseqartinniarlugu Sermitsiaq.AG sulissuteqarpoq.