upernaakkut katersorneq
Lars-Emil: Siunnersuutit taamaammat itigartinneqarput
Inatsisartut katersornissaannut oqaluuserisassanik ilanngussinissamut Partii Inuit kisimi itigartinneqanngilaq
- Inatsisartuni oqaluuserisassanut ilanngussinermi ilusiliinissamik piumasaqaat inatsisaavoq. Taamaammat inatsit iluarinngisaq malikkumanngiinnarneqarsinnaanngilaq – pingaartumik inatsisiliortutut suligaanni.
Taama oqaaseqartoq tassaavoq Inatsisartut siulittaasuat Lars-Emil Johansen Siumumeersoq Partii Inuit siulittaasuata Nikku Olsenip uani nittartakkami oqaaserisaanut akissuteqarluni. Nikku Olsen isumaqarpoq Inatsisartunut siunnersuutit aningaasatigut allaffissornikkullu kingunerisassaannik naatsorsuineq Inatsisartuni ilaasortat suliassarinngikkaat. Nikku Olsen taama oqaaseqaateqarpoq Partii Inuit sinnerlugit Inatsisartuni ilaasortap Randi Brobergip upernaamut katersornissamut siunnersuutai tamarmik oqaluuserisassanut ilanngunneqarsinnaanngitsut nalunaarutigineqareersoq.
Atuaruk: Partii Inuit siunnersuutaat tamarmik itigartinneqarput
Atuaruk: Partii Inuit kalaallisuinnaq allattalerput
Qallunaatuumut nutserinermut aningaasat
- Upernaakkut katersornissamut oqaluuserisassanik ilanngussinissamut Partii Inuit kisimik itigartinneqanngillat. Siunnersuutit ilaat Siumup, Inuit Ataqatigiit, Demokraatit aamma Partii Naleqqat tunniussaat aamma itigartinneqarput ilusissatut piumasaqaatinik naammassinnissimannginnerat pissutaalluni, Lars-Emil Johansen Sermitsiaq.AG-mut oqarpoq.
Inatsisartut suleriaasiat inatsisaavoq Inatsisartunit akuerisaasoq. Taamaammat Lars-Emil Johansenip paasiuminaatsippaa Inatsisartut suleriaasiannik Partii Inuit malinnikkusunnginnerat.
- Inatsit Inatsisartuni partiinut tamanut ilaasortanullu atuuppoq. Allannguutissamik siunnersuuteqarnikkut aatsaat tamanna allanngortinneqarsinnaavoq, Lars-Emil Johansen erseqqissaavoq.
Partii Inuit 2013-mi aalajangerput Inatsisartuni najoqqutassiatik kalaallisuinnaq allattalerniarlugit. Tamannali partiinut tapiissuteqartarnermi aporaaffittaqarsinnaavoq.
- Partiinut tapiissutit annertussusaat aalangersagaavoq partiit qallunaatuumut nutserinissaat aamma eqqarsaatigalugu, Lars-Emil Johansen uparuaavoq.
Inatsisartut upernaakkut katersornerat martsip 18-at aallartissaaq.