Lattergas - qeriuaannartumut navianartorsiortitsisoq
Ilisimatusarfimmi Zackenbergimi Tunup avannaaniittumi ilisimatuup siunissami silap pissussaanut sunniuteqartussaq siusinnerusukkut eqqumaffigineqarsimangitsoq tikkuarpaa.
Lattergas quianarpaluttumik taaguuteqaraluarluni silap kissakkiartorneranut sunniuteqarluarsinnaavoq. Ilisimatooq qallunaaq naapertorlugu immaqa taanna silap kissakkiartorneranut sunniuteqarnerpaajussaaq.
Tassaavoq avatangiisinut tunngatillugu kemimi ilisimatooq Københavnip Universitetianeersoq Bo Elberling, ilisimatusarnikkut atuagassiami Nature Geosciencerami allammat lattergas nunarsuup illersuutaanik ozonimik annikillisaallunilu silap kissakkiartorneranut annertusaasinnaasoq.
Tunup avannaani ilisimatusarfimmi Zackenbergimi paasisat nutaat tunngavigaat avannaani nuna qeriuaannartoq silap kissakkiartornera ilutigalugu aakkiartortillugu lattergas annertooq pilersinneqarsinnaasoq.
Maannamut ilisimatuut eqqartortarpaat metan annertooq peqqutigalugu silap kissakkiartornissaa - tassalu nunap qeriuaannartup aanneratigut pinngortartoq.
Metan "taamaallaat" 23-iaammik CO2-mit sakkortuneruvoq, lattergassili N2O-mik taaguuteqartoq CO2-miit 300-iaammik sakkortunerulluni.
/ritzau/