Lauge Koch sikumik aserorteriniartoq
Umiasuaq alapernaarsuut Lauge Koch sapaatip akunnerata siuliani nunaqarfimmi Nuussuarmi sikumik aserorterisimavoq, nunaqarfiullu orsussanik pilersorneqarnissaa iluatsitsiffiunngitsoorpoq
Lauge Koch nunaqarfiup Nuussuup eqqaani, Upernaviup avannaata tungaani 80 sømilisut ungasitsigisumi sungiusarnerani aalajangertoqarsimavoq, umiarsuaq Orasila nunaqarfimmut orsussamik pajuttoq ikiorneqassasoq.
Tulattarfianut isaariaq tikillugu siku aserortinneqarsimavoq, sikulli aserortikkat avammut anillannissaannut iluliaq ikkarlisimasoq akorngutaaboq, Issittumi Sakkutoorqarfik nittartakkani aqqutigalugu ilisimatitsivoq.
Tamatuma kinguneranik nunaqarfimmiut orsussaasivimmik immeqqinneqarnissaannut suli utaqqeqqittariaqassapput, Issittumi Sakkurtooqarfiup nittartagaani allassimavoq.
Lauge Koch qaammammi kingullermi Kalaallit Nunaata kitaata sineriaani angalasimavoq- Nunap isuaniit avannaani Nussuarmut, ilaatigut Silaannakkut sakkutuut qulimiguuliutaannik sungiusartarsimalluni.