Pituffik
Lidegaard: USA pisoq pillugu oqaloqatigissavara
- Kalaallit Nunaata, Danmarkip USA-llu naammagisimaagaannik isumaqatigiittoqartariaqarpoq, nunanut allanut ministeri Martin Lidegaard oqarpoq
- Aalajangiineq naammaginartinngilara. USA-lu politikkikkut isumaqatigiissuteqarnitta anersaava malinneqanngilaq, nunanut allanut ministeri Martin Lidegaard TV2-mut oqarpoq.
Suliffeqarfiup Exelis Servicesip Pituffimmi kiffartuussinissamut isumaqatigiissutaa allanngortinneqassanngilaq. Greenland Contractors suliffeqarfiillu marluk suliarinnittussarsiussinermi naammangittaallioraluarnerat kinguneqanngitsoorpoq, tamannalu pillugu nunanut allanut ministeri oqaaseqarpoq.
Exelis Servicesip Pituffimmi kiffartuussinissamut isumaqatigiissutaa septembarip 30-anit aallartittussaq atuuttussanngortillugu Amerikarmiut suliarinnittussarsiussinermi naammagittaalliorfik Government Accountability Office aalajangerpoq. Exelis Servicesip Pituffimmi kiffartuussinissamik isumaqatigiissutaa ukiuni arfineq marlunni atuutissaaq.
Aaqqiissutissanik nassaarniarnissaq
Exelis Services akikinnerusunik sulisoqarsinnaanera Pituffimmi kiffartuussinissamut isumaqatigiissummut ajugaaneranut tulluartuunnginnersoq TV2-mit Martin Lidegaard aperineqarpoq.
- USA-mik isumaqatigiissut ersarissuuvoq. Kiffartuussinissamik isumaqatigiissuteqartut danskit imaluunniit kalaallit suliffeqarfianninngaanniissapput, oqarpoq.
- Suliffeqarfimmi piginneqatigiiffiuvoq. USA-lu ataatsimeeqatigiinnitsinni aaqqiissutissanik ujarlissaanga. Tassani Kalaallit Nunaata, Danmarkip USA-llu naammagisimaagaannik isumaqatigiittoqartariaqarpoq. Kalaallit Nunaat isumaqatigiissummi iluanaarnerpaasussaavoq, Martin Lidegaard TV2-mut oqarpoq.