ajornartorsiornermi attaveqaqatigiinneq
Liveximik sungiusarnermi tusagassiorfiit malinnaapput
Tusagassiorfiit piviusut piviusuusaartullu malinnaaqataatinneqarput ajunaarnersuaqartillugu oqartussaasut qanoq pitsaatigisumik attaveqaqatigiinnersut
Oqartussaasut soorlu politiit Issittumilu Sakkutooqarfik ajunaarnersuaqartillugu, assersuutigalugu Nuup eqqaani umiarsuarnik aporujussuartoqartillugu, qanoq pitsaatigisumik imminnut attaveqaqatigiittarpat?
Tamanna misiligarneqarpoq Liveximik sungiusarnermut, ulluni makkunani Nuummi ingerlanneqartumut atatilllugu.
Immikkut ittumik sungiusaqatigiinnermi tamatumani nunatsinnit peqataapput KNR aamma Sermitsiaq, taakkualu oqartussaasut apersorlugillu allaaserisanik pisuusaartitanik allaaserinnipput aammalu umiarsuarnik ajunaarnersuaqarnera pillugu immikkut aallakaatitsillutik, taamatuttaarlu oqartussaasut tusagassiorfinnut nalunaarutinik piviusuusaartitanik nassiussuillutik.
Tusagassiorfiit nunatsinneersut saniatigut sungiusarnermi aamma peqataatittuusaarneqarput qallunaat tusagassiorfii tusagassiorfiillu tuluttut oqaasilinneersut.