Maanna 16-17-inik ukiullik akiuussuserneqassapput
Sapaatip-akunnerata tulliani akiuussusersuinerni 16-inik 17-inillu ukiullit ilanngunneqassapput. Danmarkimisut 12-inik 15-inillu ukiullit akiuussutissamik neqeroorfigineqannginnerini nakorsaanerup piffissaq takoqqaarniarpaa.
Danmarkimit akiuussutissat Pfizer-BioNTechimeersut tikilerput, pilersaarullu malillugu sapaatip-akunnerata tulliata aallartinnerani tikissapput. Akiuussutissat 16-17-inik ukiullit akiuussusersorneqarnerinut atorneqassapput, taakku maannamut maani Nunatsinni akiuussusersuisoqarnerani ilanngunneqarsimanngillat.
- Pilersaarusiornissaq pisariaqalaarpoq, akiuussutissaq Pfizeri suliariuminaannerummat toqqorsivimmiitikkuminaannerummallu. Taamaammat neqeroorut ataatsikkut nuna tamakkerlugu atuutissanngilaq. Illoqarfinni anginerusuni aallartissaagut, nakorsaaneq Henrik L. Hansen Sermitsiaq.AG-mut ilisimatitsivoq.
Inuusuttut akiuussusersuinermut ilanngunneqarnerat nakorsaanerup oqarnera naapertorlugu politikkikkut aalajangerneruvoq, tamannalu sapaatip-akunnerani kingullermi pivoq.
Eqimattani inuusuttuni 16-17-inik ukioqatigiit 1500 missaanniipput, tamarmillu taakku marloriarlutik kapitinnissaannut maanna nassiussat naammapput.
Nakorsaanerup akiuussuserneqartut ataatsimut amerlassusaat ernumassuteqarfigaa
Sapaatip-akunnerata tulliani Aasianni Sisimiunilu akiuussusersuisoqassaaq, nunatsinnilu kikkut tamarmik 18-inik ukioqalereersimasut akiuussutissamik neqeroorfigineqareerput.
Tamatuma kingorna sumiiffinni akiuussutissamut neqeroorummut akuersititsiniarfioreersunut neqeroorneq aallartinneqassaaq, Henrik L. Hansen ilisimatitsivoq.
Akiuussutissanik pissarsiniarnermik unamminartoqartitsiunnaarpoq, akiuussutissat pisariaqartinneqartut tamarmik Danmarkip tunniussinnaalermagit, kisianni akiuussusersuinermut peqataaneq suli naammanngilaq, nakorsaanerullu tamanna ernumanartoqartippaa.
- Innuttaasut akiuussuserneqarsimaasut 60 procentimut naammassiniarpasipput, tamannalu malunnaatilimmik tunillaassuuttoqarnissaanut qulakkeerinninnermut naammanngilaq, taava maanna innuttaasut neqeroorummik tigusinissaat apeqqutaalerpoq, nakorsaaneq oqarpoq.
Danmarkimi 12-15-inik ukiullit akiuussuserneqarnissaat neqeroorutigineqalereerpoq, kisianni nakorsaaneq maani nunatsinni taamaaliornissamut piareersimanngilaq.
- 12-15-inik ukiullit aallartinnginnerini Danmarkimit misilittakkat arlallit takoqqaarusuppagut, taanna oqarpoq.