Maannamuugallartoq aliasunnermi sulinngiffeqartoqartassanngilaq
Aliasunnermi akissarsiaqarluni sulinngiffeqarsinnaanissamut aningaasartuutissat naatsorsorneqarnissaatNaalakkersuisut pinaasissutigaat. Apeqqummi ilisimaneqanngitsut amerlavallaarput, oqaatigineqarpoq.
Uteqqeriarlugu aallaqqaataaniit.
Inuiaqatigiit akiligaannik aliasunnermi sulinngiffeqarsinnaaneq pillugu Inatsisartunut ilaasortap, Peter Olsenip (IA), §37 naapertorlugu apeqquteqaataanut, Naalakkersuisut taamatupajaaq akissuteqarput.
Inatsisartuni aliasunnermi sulinngiffeqartarneq pillugu oqallinnerup AG nr. 44-mi eqqartorneqartup kingorna, »qaniginerpaasaminnik annaasaqarsimasut aliasunnermi nalaani qaammatit arfinillit tikillugit akissarsiaqarluni sulinngiffeqartalernissaat atulersinneqassappat« nunatta karsianut qanoq akeqassanersoq ilaatigut apeqqutigaa.
Kisianni isumaginninnermut, ilaqutariinnut, suliffeqarnermut nunamullu namminermut naalakkersuisup akissutaani akiuminaatsoq paasinarsivoq: Apeqqutit ilisimaneqanngitsut amerlavallaarput, aningaasartuutaasinnaasut pillugit naatsorsuiniarnermik periarfissiinngitsut, naalakkersuisoq Jess Svane (S), akissummi allappoq.
Tamatuma peqatigisaanilli Peter Olsenip sukumiinerusumik aliasunnermi sulinngiffeqarsinnaanermut tunngasumik atorfilittanut nutaamik suliassanngorlugu apeqquteqarnissaanik periarfissippaa. »Qanigisaanerpaat« pillugit qanoq nassuiaateqassanersoq aalajangiisuunerpaavoq: Kikkuuppat – aamma qassit pineqarpat?
