qinersineq
Mads Peter Grønvoldip qinigassanngortinnini tunuartippaa
- Timera tusaasariaqarpara, politikkerip qinigassanngortinnini pillugu nassuiaavoq. Suiaaqatigiit katissinnaanerannut akerliunini pillugu oqaaserisani annertuumik isornartorsiorneqartareerpoq
Partii Naleraq tunuliaqutaralugu Inatsisartunut qinigassanngortinnini Mads Peter Grønvoldip tunuartillugu nalunaarutigaa.
- Suli peqqissivinngilanga. Politikkikkut suliaqarnissara suli tamakkiisumik nukissaqarfiginngilara, politikkeri Sermitsiaq.AG-mut oqarpoq.
- Suiaaqatigiit pillugit oqaaseqarnerit Partiimi siulersuisunit aalajangerninnut tatineqarpit?
- Naamik, taamaanngilluinnarpoq. Uanga nammineerlunga aalajangigaraara. Eqqarsarluaqqaarnanga qineqqusaarpunga, timerami suli sanngiippoq. Ungasinngitsumi naggataamik kemo-mut nakorsarneqarpunga. Suli aamma stomiposeqarpunga, Mads Peter Grønvoldip taxartitsinerani Sermitsiaq.AG-mit oqaloqatigineqartoq oqarpoq.
Suli napparsimasoq
- Inaluganni kræfteqarnera marsimi paasivara, taannalu timima ilaanut aamma malunniuppoq, Peter Grønvold oqaluttuarpoq.
Grønvold suiaaqatigiit pillugit oqaaseqarnini pissutigalugu annertuumik isornartorsiorneqaqqammerpoq, taannalu pissutaalluni KNR-TV-kkut qinersinissamut oqallinnissami peqataanissaralua partiimit peerneqarluni.
Danmarkimut nuussaaq
Partii Naleraq tunuliaqutaralugu qinigassanngortikkaluartoq Danmarkimut nuunnissani oqaatigaa.
- Ilaquttakka pingaartissavakka piffissami tulliuttumi. Ilaqutariiulluta aalajangerpugut Danmarkimut nuunniarluta, peqqinnissaqarfimmi aamma ingerlalluarneruvoq Danmarkimi, Mads Peter Grønvold oqarpoq.
- Vejlemi decembarip aallaqqaataanit najugaqarfissatsinnik nassaarpugut, taannalu nuuffigissavarput, Mads Peter Grønvold oqarpoq. 2011-mili timimigut ippigisaqartarnini pissutigalugu peqqinnissaqarfillu aaqqiagiinngissuseqarput.
- Peqqinnissaqarfiup ippigisakka upperiumanngeqqaarnikuuaat.
- Tusagassiutinut nalunaaruteqarniarlunga aarlerisaarereerama aatsaat Nuummukaanneqarpunga nakorsaniillu misissorneqarlunga. Innuttaasut taamatut sullinneqartarnerat akuersaarneqarsinnaanngilaq, Grønvold oqarpoq.
Mads Peter Grønvold Kattusseqatigiit Partiiat tunuliaqutaralugu Inatsisartuni ilaasortaavoq 1999-mit 2002 ilanngullugu.