Mahattanimi pisimasumi kredsretimi eqqartuussisoqarpoq
Manthattanimi pisimasumi tigusarineqarsimasut pingasut tamarmik ilaatigut politiinik persuttaasimasutut eqqartuunneqarput.
Sapaammi martsip 9-anni ullaakkut siusissukkut, imerniartarfiit matoreersut, Nuummi diskotekimi Manhattanimi paggittorsuaqarpoq, matulerisut politiinit ikiorserneqartariaqarlutik. Tallimat persuttaasutut tigusarineqarput Nuummilu Eqqartuussivimmut sassartinneqarlutik, tassani pingasut tigummigallagassanngortinneqarlutik, sinneri iperagaasut.
Pagginnernut atatillugu matulerisut pingasut politiillu pingasut annikinnerusumik aqqunartiterput.
Maanna pisimasumi eqqartuussivimmi eqqartuussisoqarpoq, angullu tigummigallarneqartoq 30-inik ukiulik qaammatini qulingiluani pinerluuteqarsimasunut inissiisarfimmiittussanngortinneqarluni taannalu pineqaatissiissutip ingerlateqqinnissaanut eqqarsarnissaminut piffissaqarusuppoq, arnaq tigummigallarneqartoq 26-inik ukiulik qaammatini pingasuni pinerluuteqarsimasunut inissiisarfimmiittussanngortinneqarpoq pineqaatissinneqarninilu akueralugu, angullu tigummigallarneqartoq 21-nik ukiulik pinerloqqikkuni atugassaminik pineqaatissinneqarpoq akiligassanneqarlunilu pineqaatissinneqarninilu akueralugu.
Unnerluussisut eqqarsarnissaminnut piffissaqarusupput piffissallu sivikitsup ingerlanerani isummissapput pineqaatissiinerit Kalaallit Nunaata Eqqartuussivianut ingerlateqqissanerlugit.