Maliina Abelsen: Imminut toquttarneq pillugu oqaloqatigiinnerusariaqarpugut
Imminut toquttarneq allaanerusumik oqaluuserisariaqarparput. Tassani arnaaneq angutaanerlu, angutip nukittunera, angutillu qanoq ittuunissaanik eqqarsartaasitoqarput ilanngullugu, Maliina Abelsen erseqqissaavoq.
Inuusuttut taama amerlatigisut imminut toquttarnerat inuiaqatigiinni ajornartorsiuterujussuuvoq. Maliina Abelsen UNICEF Kalaallit Nunaanni ataqatigiissaarisoq siusinnerusukkullu isumaginninnermut Naalakkersuisuusimasoq taama isumaqarpoq.
Aviisi AG taama allappoq.
Imminut toquttarnerup pinaveersaartinnissaanut politikerit siuttutut inissisimanissaat taassuma kaammattuutigaa, inuiaqatigiinnilu suli annertunerusumik oqallittoqarnissaa kaammattuutigalugu.
- Naammattumik oqaluuserinnittannginnerput kukkuneruvoq. Immaqa taamaaliornitsinni suli amerlanerusut imminnut toqunnissaat ersissutigisarparput. Taamaattoqaannarsinnaanngilarli. Kinaluunniit ernerminik panimminilluunniit imminut toquttumik nalaataqarsimasoq kisimiilluni imminut pisuutillunilu kanngusussanngilaq. Taamaattorpassuit nalaassimavakka. Ilaqutariit taakku aliasunnerminni ikiorneqartariaqarput. Imminut toquttorpassuit.
- Taavami susoqassava?
- Imminut toquttarneq allaanerusumik oqaluuserilertariaqarparput. Arnaanerup angutaanerullu qanoq paasineqarnissaa oqaluuserisariaqarpagut. Angut nukittusussaanera, angutillu qanoq ittuusariaqarneranik naatsorsuuteqarnerput suujunnaarsittariaqarparput. Angutit sassarterlutik taamaattoorusunnginnermik sapiissuseqartariaqarpugut. Arnanut annersaasarnerit amerlavallaarujussuarput.
- Maligassiuisoqartariaqarpugut qajannarsinnaanerminnik sapiissuseqarlutik kukkusimanerminnik takutitsisinnaasunik. Kinguaassiutitigut atornerlunneqarsimanermik saqqummerluni oqaluttuarsinnaanermi sapiissuseqarnissaq pisariaqarpoq. Ingammik angutit akornanni. Ajornartorsiut ammanerusumik oqaluuserineqartalerpoq. Maligassiuisut sapiitsut akornatsinniilersimapput. Sulili amerlanernik pisariaqartitsivugut.
- Inuusuttunik qajannaatsunik atugarliornermik aniguisinnaasunik pilersitsinissarput pingaaruteqarpoq, Maliina Abelsen isumaqarpoq.
Aviisimi AG-mi atuarnerusinnaavutit. Aviisi uani pissarsiariuk: