Maliina meeqqat pisinnaatitaaffii pillugit bloggerpoq
Unicef Meeqqat pisinnaatitaaffii pillugit isumaqatigiissutip 21-inngortorsiorneranut atatillugu meeqqat pisinnaatitaaffiinik malunnartitsivoq. Ilaatigut Maliina Abelsen Unicefip nittartagaani bloggerpoq.
Ullut tamaasa meeqqat 22.000-t toqusarput pinngitsoortinneqarsinnaagaluartumik
Meeqqat 1 millioniniit amerlanerit atortittartuutinneqartarlutillu pornomi atornerlunneqartarput
Meeqqat 300.000-t tungaanoortut sakkutuujupput
Meeqqat 100 millionit tungaanoortut angerlarsimaffeqanngillat
Meeqqat 14-init inorlugit ukiullit 58 million tungaanoortut sulisinneqartarput
Meeqqat 101 million tungaanoortut atuarneq ajorput
Naak Meeqqat pillugit isumaqatigiissut ukiuni 21-ni atuussimagaluartoq nunarsuarmi tamarmi meeqqat pisinnaatitaaffii eqquutinneqarneq ajorput.
Taamaattumik UNICEF Danmarkimi tamanna malunnartinniarlugu Meeqqat pillugit isumaqatigiissutip ullorsiornerani meeqqat pisinnaatitaaffii pillugit paasisitsiniaapput. Novembarip 20-ani ullorsiornissaata tungaanut inuit nuimasut inuusuttullu meeqqat pisinnaatitaaffinik sorsuuteqartut nittartakkami bloggissapput meeqqat pisinnaatitaaffii pillugit isummaminnik saqqummiillutik.
Ukiut 21-it ingerlaneranni nunat 193-it FN-ip meeqqat pisinnaatitaaffii pillugit isumaqatigiissut atsiorsimavaat, taamaalillutik meeqqat nerinissaminnut, ineqarnissaminnut, peqqinnissamut, ineriartornissamut, illersorneqarnissamut oqartussaaqataanissamullu pisinnaatitaaffiisa eqquutinneqarnissaannut pisussaaffilerlutik. Unicef Danmarkip malunnartitsinermini meeqqat pisinnaatitaaffii pillugit inuit 21-it bloggernissaannik periarfissippaat, ilaatigullu tassaapput grevinde Alexandra, quiasaarisartut Rune Klan aamma Sebastian Dorset, aammalu nunatsinniit Zambiamiit Danmarkimiillu meqqaat.