Maliinap Qiperoq pulaarniarpaa
Isumaginninnermut naalakkersuisup Maliina Abelsenim kalaallit Købnhavnimi ornittagaaq Qiperop takusarniarpaa.
Isumaginninnermut Naalakkersuisup Maliina Abelsenip ulluni aggersuni Danmarkimi isumaginninnikkut sullissiveqarfiit arlallit pulaassavai.
Maliina Abelsenip Danmarkimi kalaallit ornittagaanik ilisimasani suleqateqarninilu nukittorsarusuppai. Taamaattumik Qiperoq Københavnimi kalaallinut suliassaqartitsivik attaveqaataasorlu pulaassavaa.
- Qiperoq pillugu tusagaqaqaanga, sumiiffiup inuillu tassaniittut nammineq naapinnissaat qilanaaraara. Kalaallit Qiperumukartartut namminneq taassuminnga ilusilersueqataasimapput ulluinnarnilu aaqqissugassanut peqataatitaasorujussuullutik. Tamanna nuannaajallannartutut isigaara – taamaattumik naapikkusuppakka qanorlu ornittakkamik atuinersut takorusullugit, kiisalu Danmarkimi najugaqarnerannut pissutaasut tusarusullugit, Maliina Abelsen oqarpoq.
Maliina Abelsenip aamma kalaallit annertuumik innarluutillit Danmarkimi najugallit naapissavai.
- Pingaartumik inuit Danmarkimi najugallit Kalaallit Nunaannut attaveqaannarnissaannut qanoq ililluta qularnaareqataasinnaanersugut takorusuppara, Kalaallit Nunaanni ikiornissaannut periarfissaqannginnatta, Maliina Abelsen oqarpoq.
Tamatuma saniatigut Maliina Abelsenip Danmarkimiinnermini isumaginninnikkut, ilaatigut autistinut, kiisalu isigiarsuttunut tusilartunullu sullissiveqarfiit arlallit pulaassavai. Aammattaaq USA-p Danmarkimi aallartitaa ataatsimeeqatiginiarpaa.