Maniitsoq arfernik nasiffittaarpoq
Pisuinnaat ikaartarfiannik, qipoqqarnik nasittarfissamik innuttaasut kissaateqarsimapput, tamannalu kommunalbestyrelsip naammassivaa.
Arfernik nasittarfik tassaavoq pisuinnaat ikaartarfiat marlunnik angisuunik nasittarfilik Toqqusaap qaarsuini avallerpaamiittoq, tassanngaanniit aasakkut pingaartumik qipoqqaat tamaanga pikulasartut nasinneqarsinnaallutik.
Arfernik nasittarfik innuttaasut gruppiisa sulinerisa kinguneraa, tamakkua pilersinneqarsimallutik kommunip 2009-mi illoqarfimmi innuttaasut qaaqqummagit Maniitsup siunissaa pillugu oqaloqatigiinnissamut. Tassani kulturimut takornariaqarnermullu gruppip arfernik nasittarfiliornissaq isumassarsiaraa, tassani oqaloqatigiissutigineqarsimalluni arferit Maniitsoq immikkut ittutut isigineqalersikkaat, illoqarfimmi innuttaasunut aasakkullu takornariarpassuarnut. Illoqarfimmi innuttaasut ataatsimiitinneqarneranni isumassarsiaq tamanna saqqummiunneqarpoq isumassarsiarlu tapersersorneqaqimmat kommuni aalajangerpoq suliniut piviusunngortinniarlugu.
Maanna innuttaasut gruppiannik malinnaatitsisussamik pilersitsisoqarsimavoq, "arfernut gruppimik, taassumalu Qeqqani Inuussutissarsiornermut Siunnersuisoqatigiit suleqatigalugit sulissutigaa arfernik nasittarfik suliniutinik tapertalerneqarnissaa tikeraanut tamakkiisumik misigisaqartarfissatut Maniitsorlu angalaffissatut piukkunnarsaqatigissallugu. Ilaatigut sulissutigineqarpoq arfernik nasittarfimmit uumasut suut takuneqarsinnaanerannik paasissutissiissutinik allagartaliiffiliornissat qinngutinillu inissiinissat, inuit arfernik qanittumut takunnissinnaaqqullugit.