Maniitsoq avinniarluni qinnuteqartoq: Sisimiut aamma avikkusulerpoq
Sisimiuni innuttaasut pingasut Maniitsoq kommuneqatigiunnaarusullugu atsiornernik katersipput. "Ajornartorsiutinut tamanut Sisimiut pisuutinneqartuarnerat qatsupparput", ilaatigut taama tunngavilersuillutik avinnissamik kissaateqarput.
Maniitsoq Qeqqata Kommunianiit avikkusulluni kissaateqareersorlu Sisimiut aamma avikkusulluni kissaateqarnialersaarpoq.
Sisimiuni innuttaasut kommunimi namminiilerusullutik maanna atsiornernik katersipput.
- Kommunit kattunneqarnerisali kingorna Maniitsumiit nipi tujorminartoq Sisimiunut atorneqartuartoq qatsupparput, taama Marianne Lyberth Olsen, Peter Olsen kiisalu Nuka Johansen tunngavilersuillutik allapput. Taakku pingasunngornermi ullup qeqqa qaangeraa atsiornernik katersillutik aallartipput.
Sisimiuni innuttaasut nammineerusupput
Atsiornernik katersisut pingasuusut ilaatigut tunngavilersuutigaattaaq Sisimiunut aningaasaliisoqartorlu Maniitsumiit apeqqusersorneqartuarnerat qatsullugu. Aamma qatsuppaat Maniitsumut aningaasaliissutigineqartut naammaginagit suli amerlanerusunik perusullutik naammagittaalliortuarnerat.
- Sisimiuni akileraartartuusugut akileraarutigut soorunami aamma Sisimiuni ineriartortitsinermut apeqqusersorneqaratik atorneqarsinnaasariaqarput.
- Kommuneqatigiit akornganni akeqqersimaarneq arlaannatsinnulluunniit iluaqutaananilu peqqinnaanngilaq. Tamannalu qaangerneqassappat isumaqarpugut Sisimiut Maniitsorlu immikkut kommuningoqqittariaqartut.
Allaaserisap suliarineqarnerani avikkusullutik atsiortut 77-upput.