Maniitsormiu qernertamik pisaqartoq
NUTARTIGAQ: Aalisartoq Svend Heilmann Maniitsumut ullaaq tikiussivoq qilalukkamik qernertamik Kangerlussuarmi pisaminik.
Qilalugaq qernertaq Kangerlussuup, 180 km.-inik takissuseqartup, qinngorpasissuani pisarineqarpoq.
Qilalugaq ippassigami qulimiguulimmit Kangaamiormiunillu tappavaniittunit takuneqarpoq. Svend Heilmann tamanna tusaramiuk aalisarnermut piniarnermulu pisortaqarfimmut qinnuteqarpoq pisariartorumallugu, akueritikkamilu tappavunga pisariartorpaa.
– Qaqutigut arfernik Kangerlussuarmut pulasoqartarpoq, pulasullu immaqa kiammit toquinnartarput. Qilalugaq qernertaq tusarakku iluaqutigineqarnissaa pillugu pisariartorumasimavara, Svend Heilmann oqaluttuarpoq.
Ukiut marlussuit matuma siorna tikaagulliusaaq Kangerlussuup qinnguani siluusoq nassaarineqarpoq, nakkutilliissutillu arlaannit kalillugu silammukaanneqartoq Svend Heilmannip eqqaamaniarpaa.
Qilalukkap tuugaava saqqumisoq 2 meter 18 centimerinik takissuseqarpoq, taannalu Maniitsup Kommuniannut ukiunik 225-inngortorsiortumut tunissutigineqassasoq Svend Heilmannip qinnutigisimavaa.
Neqaa mattaalu Maniitsumi Kangaamiunilu utoqqaat Illuinut tunniunneqarput.