Maniitsumi ilinniartitsisut qimarrattut: Ilinniartitsisut 18-it ukiut marluk ingerlaneranni soraarniuteqarput
Allakkanik takunnissinnaatitaanermi paasinarsivoq, Atuarfik Kilaaseeqqami ilinniartitsisut Qeqqata Kommuniani illoqarfimmi allami atuarfinnut marlunut sanilliullugit soraarniuteqarsimasut amerlanerungaatsiartut.
![Maniitsumi ilinniartitsisut qimarrattut: Ilinniartitsisut 18-it ukiut marluk ingerlaneranni soraarniuteqarput](https://image.sermitsiaq.ag/363510.webp?imageId=363510&width=960&height=518&format=jpg)
Sisimiuni meeqqat atuartut aalajaatsunik ilinniartitsisoqartut, Maniitsumi meeqqat atuartut ilinniartitsisut taarseraannerujussuat misigaat.
Maniitsumi Atuarfik Kilaaseqqami ilinniartitsisut, minnernik ilinniartitsisut timelærerillu katillugit 18-t ukiut marluk ingerlaneranni soraarniuteqarsimasut, Sermitsiaq.AG-p Qeqqata Kommunianit kisitsit pissarsiarisimasaanni takuneqarsinnaavoq.
Maniitsumi ilinniartitsisut soraakaasut
Maniitsumi Atuarfik Kilaaseeqqami ilinniartitsisut 18-it soraarsimasut, Sisimiuni Minngortuunnguup Atuarfiani ilinniartitsisut sisamat soraarsimapput, Nalunnguarfiullu Atuarfiani ilinniartitsisut tallimat ukiuni kingullerni marlunni atuarfimmut atuartunullu inuulluaqqusisimapput.
Ilinniartitsisut atuarfimmit soraarnissamut assigiinngitsunik pissuteqarsimasut, Atuarfik Kilaaseeqqami pisortaagallartoq Mina Marie Andersen nassuiaavoq:
- Ilinniartitsisut soraartut assigiinngitsunik peqquteqarpasittarput amerlanertigut peqqutaasoq taavinneq ajorpaat. Nalunngisannili makku taaneqartarput: Namminneq inuttut killiffik/atukkat, Illoqarfik sungiussinnaanagu, meeqqamik atuarnerat/peqqinnerat, peqqinnissartik, ilaquttatik, suliffik pilerigisaminni periarfissaqalerneq ilaalu ilanngullugit.
Sisimiuni ilinniartitsisut illoqarfimmut allamut nuunneq soraarninngornerlu peqqutaallutik soraarniuteqarsimasut, Qeqqata Kommunia nassuiaavoq.
Atuarfik Kilaaseeqqami meeqqat atuartut katillugit 356-iupput.