Maniitsumi ilinniartitsisuusimasut nipangersimajunnaartut: Persuttaanerit aqutsinerlunnerlu soraarnermut peqqutaasut

Atuarfik Kilaaseeqqami ilinniartitsisuusimasut arlallit soraarniuteqarsimasut Sermitsiaq.AG-ip attaveqarfigai.

Taakku soraarniutiminnut peqqutaasut oqaluttuaraat.

Ilinniartitsisut atuarfimmit soraarnissamut assigiinngitsunik pissuteqarsimasut, Atuarfik Kilaaseeqqami pisortaagallartoq Mina Marie Andersen nassuiaavoq. Ilinniartitsisut soraartut assigiinngitsunik peqquteqarpasittartut, amerlanertigulli peqqutaasoq taavinneq ajoraat ilaatigut nassuiaatigaa. Nalunngisaminili makku taaneqartartut oqaatigai: Namminneq inuttut killiffik/atukkat, illoqarfimmik sungiussisinnaannginneq, meeqqamik atuarnerat/peqqinnerat, peqqinnissartik, ilaquttatik, suliffik pilerigisaminni periarfissaqalerneq ilaalu ilanngullugit.

Ilinniartitsisulli Sermitsiaq.AG-mit attaveqarfigineqartut atuarfiup pisortaagallartup eqqaanngisai arlallit eqqaavaat. Ilaatigut aqutsinerlunneq suliffimmi isumannaallisaanikkut pissutsini sunniuteqartartoq kiisalu atuarfimmi timikkut tarnikkullu persuttaasarnerit eqqaaneqarlutik.

- Assersuutigiinnarlugu atuartumit timikkut tarnikkullu persuttagaareernerup kingorna, suli isasooqqanerma nalaani, atuartitsiartornissannik piumaffigineqaraluarpunga.

- Isumaqarpunga sakkortuumik pisoqartillugu qisuariarnissamut sakkussanik naammattunik peqartoqarsimanngitsoq.

Apersorneqartup kinaassusaa Sermitsiaq.AG-mit ilisimaneqartup oqaluttuaraa atuartunit timikkut tarnikkullu persuttagaasarnerup naammattumik iliuuseqarfigineqartannginnera pimoorunneqartannginneralu peqqutaallutik soraarniuteqarluni.

Apersorneqartoq suli ulloq manna tikillugu sunnerteqqavoq.

"Aqutsineq peqqutaavoq..."

Atuarfik Kilaaseeqqami oquup ajornartorsiutaanera nunatsinniit ilisimaneqarluarpoq. Atuarfiup oqoqarnera peqqutaalluni soraarniuteqarsimalluni ilinniartitsisuusimasoq alla oqaluttuarpoq:

- Qeqqata Kommuniata aqutseriaasia peqqutaavoq. Aamma soorunamili oquk peqqutaavoq, siunissami peqqinnissara qanoq sunnertissinnaanersoq ernummatigisimavara.

Atuarfiup silaannalunnera peqqutaalluni atuartut tamarmik ininut allanut atuartitsiviusinnaasunut nuussorneqarnikuupput. Nuussorneqarneratalu kingorna sulinermi atugassarititaasut nammanneqarsinnaasimanngillat:

- Assersuutigalugu atuartitakka inimut allamut, Majoriamut nuutsinneqarput. Uannut isumaqarpoq Majoriamut atuarfimmullu uteqattaassasunga, atuartitassakka allat aamma atuarfimmiikkamik. Sulinermi atugassarititaasut naggataatigut nammanneqarsinnaajunnaaramik.

Init sulisullu amigaatigineqarneri

Qeqqata Kommuniata atuarfimmi ajornartorsiutinik aaqqeeriaasaa pissutigalugu soraarniuteqarsimalluni ilinniartitsisuusimasut pingajuat oqaluttuarpoq.

- Atuarfimmi oquk pillugu sulisunillu amigaateqarnermut tunngasut pillugit Qeqqata Kommuniata aaqqeeriaasaa pillugu soraarniuteqarpunga. Pissutsini ilungersunartuni sulinerput nassuerutigineqarumasimanngilaq, sulisullu pigiinnarnissaannik suliffiullu pilerinarsarnissaannik pilersaaruteqartoqanngilaq.

- Taassuma saniatigut atuarfimmi pisortap ininik atuartitsiviusussanik pissarsiniarluni piffissarujussuaq atorpaa - naak atuarfimmi nammineq aqutsisuusussaagaluarluni. Taannali isornartorsiunngilara, ingerlatsivimmiilli pisortap ikorfartorneqarpallaarsimannginnera
tikkuarlugu.

Ilinniartitsisuusimasut sisamaat oqaluttuarpoq atuarfimmi aqutsisut ajornartorsiuteqarfigisimanagit, kisiannili isumaqarluni atuarfiup pisortaasa ininik atuartitsiviusussanik nassaarniarnissaq suliassarinngikkaluaraat.

Atuarfimmi pisortat politikkikkut aqutsinikkullu tapersersorneqanngitsut taanna isumaqarpoq.

Atuarfik Kilaaseerami ilinniartitsisuusimasut soraarniuteqarsimanerminnik oqaluttuartut kinaaneri aaqqissuisoqarfimmit ilisimaneqarput.