Maniitsup Efterskolia tikilluaqqusivoq

Inuusuttut sinerissamit tamarmeersut ulluni makkunani Maniitsuliaapput tassani ukioq ataaseq efterskolimi aallarterlaami atuassallutik, taamatut allappoq forstander Flemming Cederholm tusagassiorfinnut nalunaarummi.

Aasaq naallugu inuusuttut ullup taassuma nalliunnissaa pissangallutik utaqqisimavaat - maannalu ulloq nalliussimavoq.

Atuartut Maniitsumut tikerarput timmisartmik umiarsuarmillu, efterskolimilu sulisut umiarsualivimmi mittarfimmilu atuarfiup atuartussaanik siullernik tikilluaqqusissallutik utaqqisarput.

Efterskolimilu atuartut najugaqassapput atuartut inaanni nutaanik pequsersukkani.

Nerisarfik tikilluaqqusinissamut pinnersarneqarsimavoq igaffimmilu efterskolimi atuartut ungasinngitsukkut igaffimmiut peqatigalugit nerisassanik peqqinnartunik pissanganartunillu sanasalissapput.

Init atuartitsiviusut qaamasut inissaqarluartullu ulluinnarni atuartitsinermi atorneqassapput isersimaartarfinnilu skak-ertoqarsinnaavoq, bordtennis-ertoqarsinnaavoq nuannisaqatigiittoqarsinnaallunilu.

Suut tamarmik nuannaarnermik ilimasunnermillu nipaqarput.

Maniitsup Efterskoliani sammissavarput atuartut ataasiakkaat namminneq inuunerminnut akisussaassuseqarsinnaalernissaat.

Atuartut misilitsissutissanik atuartinneqassapput tuluit oqaasiinik, qallunaat oqaasiinik, matematikimik aamma kalaallit oqaasiinik.

Tamatuma saniatigut atuarfimmi linjefagiupput timersorneq, nipilersorneq, isiginnaartitsineq silamilu sammisassaq "nuna, imaq nerisassallu".