Manuminap angajoqqaavi: Panitta oqaluttuassartaa taamaammat saqqummiupparput
Niviarsiaqqap arfinilinnik ukiullip, Manumina Olsenip, junip pingajuani toqunissaata tungaanut peqqinnissaqarfimmit sullissineq naammaginanngilluinnartutut angajoqqaajusut misigaat. Kinaluunniit alla uatsitut misigisaqartikkusunngilarput, oqarput.
-Anaana, merialerpunga.
Oqaatsit Manumina Olsenip, arfinilinnik ukiullip, oqaasii kingulliit. Manumina Olsen arfininngornermi 3. juni unnuakkut uummamminik unittoorluni toquvoq.
Ilaqutariit annaasaqarsimasut maanna aliasupput. Paniat neqaajartereernermi kingorna qaammat ataatsip matuma siorna toquvoq. Pilattaalluni suliaritereernermit misissorneqarnissamik siunertaqarlutik angajoqqaat saaffiginnissimagaluarnerat itigartinneqarsimasoq, angajoqqaajusut misigaat. Saaffiginninnermi aattalimmik meriartarneq kingornalu qarngup iluani anniarisaqarneq nassuiaatigineqarsimapput.
- Manumina niviarsiaraavoq nuannarineqartoq mianersortorlu, ilaqutariit tamatta oqaloqatigissallugu pinnguaqatigissallugulu nuannarisarput. Ullorsiornernik nuannarisaqartuuvoq pingaartitsisuullunilu. Ikinnguterpassuaqarpoq, qatanngutaasalu aamma asasorujussuuaat. Meeraq nuannaartoq. Atualernissaminut assut qilanaartoq, allaat nammineq taqualiortalereerluni, anaanaasoq Justine Eipe Sermitsiaq.AG-mut oqaluttuarpoq.
Manumina Olsenip nakorsiarneranut tunngatillugu allagaatigineqartut Sermitsiaq.AG-p paarai. Taakkunani neqaajartissimanera toqunissaatalu tungaanut ullut tullii pineqartuni saaffiginninnerit nassuiarneqarsimapput.
Aattalimmik meriartoq – misissorneqarumanngitsorli
Nakorsiarnermit allagaatini nassuiarneqarpoq ataataasup panini kissumiarlugu pinartoqartillugu nakorsiartarfimmut arfininngornerup unnuaani eqqukkaa, akunnerillu pingajuat avillugu inuunermik annaassiniaaneq ingerlanneqarsimagaluartoq.
- Unnuk taanna nal. 23.20 missaani sinilerpoq, ulloq taanna qiimanerusimalluni nukissaqarnerusimallunilu. Uagut eqqissiallaqqanerulluta isumalluarnerullutalu, Manuminap ataataa, Frederik Olsen unnuk taanna pillugu oqaluttuarpoq.
Justine Eipe akunneq ataatsip missaa qaangiuttoq iterpoq, Manumina merialersoq. Meriaava aammaarluni aattaqarpoq, paniallu kingorna ilisimajunnaarami iteqqinngilaq, anaanaasoq oqaluttuarpoq.
Pilattartilluni suliaritereernermi kingorna Manumina aattaqartumik meriarsimavoq, nakorsamiilli misissorneqarani. Angajoqqaajusut peqqinnissaqarfimmut saaffiginnissimanerat, allagaatinngorlugu nalunaarsorsimanngitsoq, nakorsap kingorna allagaatini nassuiaatigaa.
Manumina Olsenip angajoqqaavi kingullermik sianerput tallimanngornermi 2. juni unnukkut, paasitinneqarlutilli arfininngornerup ullaavani aggersinnaasut. Tamanna angumerineqanngitsoorpoq.
Akunnerit marluk uummarsarniarneqartoq
- Aqqusaakkatta assiganik kinaluunniit misigisaqaqqunanngeqaaq. Toqu inuunitsinnut ilaaginnarpoq.
- Meeqqamilli annaasaqarneq oqimaatsorujussuuvoq, asasarput nassuiagassaanngitsumik maqaasivarput, aammami ilaqutariinni qitiulluinnartuummat. Toqummalli silarsuarput allanngorujussuarpoq. Naluarput qanoq ingerlariaqqissanerluta, Frederik Olsen oqarpoq.
Angajoqqaajusut misigisaminnik oqaluttuarput neriullutik peqqinnissaqarfimmi sullissineq siunissami pitsaanerulerumaartoq, oqaluttuaallu pitsaasumik sunniuteqarumaartoq, angajoqqaat allat taama misigisaqaqqunagit.
- Taama itigartinneqaqattaarnitta takutippaa suleriuseq ajorluinnartoq. Sullissineq ajorluinnartoq allaat inuunermik naleqartoq. Tamanna pinngitsoortinneqarsinnaagaluartoq takusinnaavarput, Frederik Olsen oqarpoq.
Pinartoqartillugu nakorsiartarfimmi niviarsiaqqap inuunera akunnerit marluk sinnerlugit annaanniarneqaraluarpoq, iluatsinngitsumilli. Manumina Olsen toqusutut nalunaarutigineqarpoq 3. juni nal. 3.00-nngorluinnalersoq.
Politiinut tunniussisut
- Isumaqarpunga ajornerulinnginnerani annaannissaanut arlaleriarlutik periarfissaqarsimagaluartut. Neqaajartereernerata kingorna sullinneqarneq pitsaanerusimasuuppat, misissujaarnerusimagaluarpassuk, Manumina suli maaniissagaluarpoq, Frederik Olsen oqarpoq.
Manuminap pinnguai suli inimiipput. Atisallu suli atisaasivimmiitinneqarput. Angajoqqaajusut poortuinissamut suli piareersimanngillat.
- Poortornissaanulluunniit innimigaagut. Suli piiarsinnaanngikkallarpagut, Justine Eipe oqarpoq.
Peqqinnissaqarfimmi sulisut atorfimminni akisussaaffimmik sumiginnaasimasutut politiinut tunniunneqarsimapput, sullinneqarnerlu pillugu naammagittaalliuutit arlallit nunatta nakorsaaneqarfianut tunniunneqarsimallutik. Peqqinnissaqarfimmi aqutsisut pisoq pillugu Sermitsiaq.AG-mit oqaaseqartinniarneqarput.