Maqaasineqartut marluk ujaarineqarnerat unitsinneqarpoq
Inuit marluk maajip aqqarnani Itillimiit Kangaamiunukarsimasut ujaarineqarnerat oqatussanit unitsinneqarsimavoq.
Kalaallit Nunaanni Politiit Issittumilu Sakkutooqarfik inunnik marlunnik Sisimiut Maniitsullu akornanni ulluni kingullerni ujaasisimapput.
Maqaasineqartut tassaapput angut 40-nik ukiulik arnarlu 37-nik ukiulik, ujaasinerlu ajoraluartumik kinguneqarsimanngilaq unitsinneqarlunilu, politiit arfininngornermi ullup-qeqqata siornatigut ilisimatitsipput.
- Sisimiut Maniitsullu akornanni sumiiffiit annertuut Politiit angallataannit ILImmit, Issittumi Sakkutooqarfiup umiarsuaanit Ejnar Mikkelsenimit Tritonimillu kiisalu Air Greenlandip qulimiguuliutaanit EC225-mit ujaasiffigineqarsimapput.
- Maqaasineqartut ilaqutaat ujaasinerup unitsinneqarnera pillugu ilisimatinneqarsimapput. Kalaallit Nunaanni Politiinit Issittumilu Sakkutooqarfimmit innuttaasut namminneq piumassutsiminnik ujaaseqataasimasut qujaffigineqarput, politikommissæri Gideon Quist tusagassiorfitsigut nalunaaruteqarluni allappoq.
Maqaasineqartut taakku marluk ataasinngornermi maajip aqqarnani nalunaaquttap 23.50-ip missaani Itillimiit Kangaamiunakarlutik aallarsimapput.
Politiit maqaasineqartut aallarnerisa aqanguani nalunaaquttap 10.05-ip kingornatigut nalunaarfigineqarsimapput, nalunaarfigineqarnerminniillu ujaasisunut peqataasimallutik.