Maqaasineqartut pingasut ujaarineqarneranni Issittumi Sakkutooqarfik umiatsiaaqqamik kivisimasumik nassaarpoq
Angutit pingasut ujaarineqarneranni oqartussat umiatsiaaqqamik kivisimasumik sulili puttasumik nassaarput.
Angutit pingasut maqaasineqartut, arfininngornermi Qeqertamiit Ilulissat tungaanut aallartut ujaarineqarneranni, Issittumi Sakkutooqarfik pingasunngornermi unnukkut nutaarsiassamik nalunaaruteqarpoq.
Illersornissaqarfiup timmisartuutaa Challengeri pingasunngornermi ualikkut umiatsiaaqqamik kivisimasumik suli puttalaartumik, umiatsiaaqqap ataasinngormalli ujaarineqartup ilisarnaataanik assingusumik sumiissusersivoq.
Umiatsiaq Qeqertarsuup kujataani nassaarineqarpoq, Issittumi Sakkutooqarfik Facebookimi allappoq.
Ujaasineq nanginneqassasoq, kommandørkaptajn Brian Jensen oqarpoq:
- Eqqumaariffigeqqissaarparput maanna qanigisaasut nalornillutillu misigissutsikkut artorsartut asasaminnillu susoqarsimanerinik paasisaqarusuttut. Taamaattumik aqagu ujaasineq nassaariffiup nalaani ingerlateqqissavarput, kommandørkaptajn Brian Jensen Issittumi Sakkutooqarfimmit oqarpoq.
Issittumi Sakkutooqarfiup nalunaarutaa naapertorlugu qanigisaasut pisunik ilisimatinneqarput.
Ujaasineq ataasinngormat aallartippoq, Issittumilu Sakkutooqarfiup innuttaasut ujaasinermi ikiuussimasut sulilu ikiuuttut qutsavigai.
Paasissutissanik suliamut ilisimasallit Kalaallit Nunaanni Politiinut oqarasuaatikkut 70 14 48 saaffiginnissapput, taama kaammattuisoqarpoq.