Mariane Paviasen (IA): Tusatsiakkat akiorneqassapput
Ukiut marluk matuma siorna Inatsisartunut ilaasortat uranimik misissueqqaarnissamut, ujarlernissamut aamma atuinissamut inerteqquteqalernissamut inatsit akuersissutigaat. Kisianni taamanerniilli suliap ingerlanerani unioqqutitsisoqarsimaneranik tusatsiakkanik ingerlaartoqarpoq.
Naalakkersuisut uranimik misissueqqaarnissamut, ujarlernissamut aamma atuinissamut inerteqquteqalernissamut inatsisissatut siunnersuutaat, 2021-mi decembarimi amerlanerussuteqalaartunit akuerineqannginnermini, inuussutissarsiornermut aatsitassanullu ataatsimiititaliami aamma Inatsisartuni isumaqatigiinngissutigineqarpoq.
Aviisi Sermitsiaq taamak allaaserisaqarpoq.
Inatsisip kinguneri
Inatsimmik malmimi 1 tonsiusumi annerpaamik 100 gramimik uraneqarnissaanik killiliisoqarpoq. Tamatuma saniatigut inerteqquteqarnerup uraniunngitsunik pinngoqqaatinik radioaktiviusunik annertusineqarsinnaaneranut Naalakkersuisut piginnaatitaalersinneqarput, tassungalu ilanngullugu radioaktiviusunik pinngoqqaatinik killissarititanik aamma misissueqqaarnernut, misissuinernut atuisinnaanernullu aalajangersakkanillu atulersitsisinnaallutik.
Inatsit Australiamiut ingerlatseqatigiiffiata Greenland Mineralsip Kuannersuarni suliniutaanut, Canadamiut Hudson Resourcesip suliniutaani Sarfartumi kiisalu franskit ingerlatseqatigiiffiutaata Oranosip Arsuup avannaani aamma Iluilimi Paatusumilu kangerlunni uranimik atuinissamik siunertaqarluni misissuineranut kinguneqarpoq. Greenland Minerals kingorna Kalaallit Nunaannut Danmarkimullu isumaqatigiissitsiniarnermik suliamik aallartitsivoq, suliniutertik inatsimmut ilaanngitsoq isumaqaramik.
Paasissutissat isertuunneqartut
Tamatuma saniatigut Naalakkersuisut inatsisissatut siunnersuummi paasissutissanik isertuussaqarsimasut, aammalu inatsisip atulersinneqarnissaa sioqqullugu suliap ingerlanerani unioqqutitsisoqarsimasoq, Inatsisartuni isussuutigineqarpoq.
– Uranimut inatsisip suliarineqarneranut atatillugu unioqqutitsisoqarsimasoq, Inatsisartuni ilaasortat ilaat isumaqarput. Kisianni taamaattoqanngitsoq qularnaatsumik ilisimavara. Taamaammat Naalakkersuisunut apeqqutinik arlalinnik nassiussivunga, tassani suliap qanoq ingerlanneqarsimanera pillugu nassuiaatitsiumavunga, aammalu Naalakkersuisut piaaralutik paasissutissanik Inatsisartunut isertuussaqarsimanersut. Tassami tusatsiakkat taamaattut peerneqassapput, Mariane Paviasen oqarpoq, taassuma tusatsiakkat kimit ingerlatinneqarnersut oqaatigiumanngilaa.
Allaaserisap sinnera aviisimi Sermitsiami atuaruk:
