Marlulissat pinngitsaaliissummik arsaarinnissutigineqartut
Qupalu Platou marluliaatini nukappiaqqat pingasunik qaammatillit peqatigalugit Nuummit Danmarkimut 2015-imi nuuppoq. Nukappiaqqat 2017-imi pinngitsaaliissummik arsaarinnissutigineqarput. Qupaluup oqaluttuassartaa Sermitsiamut oqaluttuarineqartoq matumani atuarsinnaavat.
Qupalu Platou mediegrafikeritut ilinniarnini aallartinniarlugu Danmarkimut 2015-imi nuuppoq. Marluliaatini inoorlaat nukappiaqqat Nuka aamma Angaju ilagai. Nukappiaqqat angutaata Kalaallit Nunaanni sanasutut ilinniakkaminik naammassinnikkuni malinninnissaa pilersaarutaavoq. Aviisi Sermitsiaq allappoq.
Kisianni Danmarkimi inuuneq allanngorujussuarpoq, siullermi Holstebro Kommune kingornalu Ringkøbing-Skjern Kommune Qupalumik ernerinillu soqutiginnilermata. Ukiut marluk ingerlaneranni suliap immikkoortortai amerliartorusaarput, Qupaluullu erneri 2017-imi pinngitsaaliissummik arsaarinnissutigineqarlutik.
Nukappiaqqat ullumikkut arfineq-marlunnik ukioqarput angajoqqaarsiaasartunilu najugaqarlutik. Qupaluup sapaatip-akunneranut akunnerni marlunni ilagisarpai, kisiannili peqatigiiffik Foreningen Mentor Immanuel eqqartuussissuserisorlu peqatigalugit nukappiaqqat piffissaqarfiginerulernissaat kalaallinullu Danmarkimi najugaqartunut naapertuilluarnerusumik ingerlasoqalissaa suli sukataarutigai.
– Suliaq uannut tunngasoq tamanut isertuukkunnaarsimavara. Sassarusuppunga qanorlu misigisaqarsimanera oqaluttuaralu, suliaq uannut tunngasoq kalaallinut Danmarkimi najugaqartunut iluaqutaasinnaassasoq neriuutigalugu. Ullumikkut qanoq iliornera ilisimasimagaluarakku kommuni ikiortissarsiorfigalugu saaffiginngisaannarsimassagaluarpara. Kommunimullu eqqartuussissuserisumik, suliamut attuumassuteqartumut sinniisumik illersuisumilluunniit peqateqarnanga takkutinngisaannarsimassagaluarlunga, Qupalu Platou, pisut ingerlanerani siusinaartumik sulisinnaajunnaarnersiuteqalernissamik aamma neqeroorfigineqarsimasoq, ilaatigut taama Sermitsiamut oqarpoq.
Allaaserisaq tamaat uani Sermitsiami pisiarisinnaasanni atuaruk: