Marlunnik ukiulimmik toqutsinermi eqqartuussisoqarpoq

2010-mi marsimi Uummannap eqqaani Ukkusissani niviarsiaqqamik marlunnik ukiulimmik naalliutsitsillunilu toqutsinermut suliassami pingasunngormat septembarip 21-ianni Kalaallit Nunaata Eqqartuussivia eqqartuussivoq.

Unnerluutigineqartut tamarmik ukiuni qulingiluani pinerluuteqarsimasunut inissiisarfimmiittussanngorlugit pineqaatissinneqarput.

Unnerluutigineqartut tassaapput meeqqap arnaa arnaatalu inooqataa. Marluullutik pisuutinneqarput meeeqqap toqunissaa qaammatinik arlalinnik sioqqullugu assigiinngitsutigut meeqqamik persuttaallutik naalliutsitsisarsimasutut, kiisalu 2010-mi marsimi meeraq ima ajoqusersimatigigaat, meeraq ilisimajunnaarluni, ikortissarsiortoqanngimmallu toqulluni.

- Suliassami ukiuni qulingiluani pinerluuteqarsimasunut inissiisarfimmut inissinneqarnissaannik unnerluussisut piumasaqaataat eqqartuussiviup malippaa. Ukiuni qulingiluani inissiisarfimmiititsinissamik piumasaqaatitsinnut pissutaavoq unnerluutigineqartut marluk sianissusaat misissortissimagatsigit, tamatumanilu inerniliisoqarpoq niaqulaartuunngitsut, imaluunniit inissinneqarnermik eqqartuunneqarnissaannut tunngavissaqartoq. Isumaqarsimavugullu ukiuni qulingiluani pinerluuteqarsimasunut inissiisarfimmut pineqaatissinneqarnissaat naapertuuttoq, politimesterip tullia Morten Nielsen oqarpoq.

Kredsrettimi eqqartuussisoqarmat suliassaq unnerluussisut eqqartuussivimmut qaffasinnerusumut ingerlateqqippaat. Unnerluussisut aallaqqaataaniilli piumasaqataattut toqutsisimasutut eqqartuunneqarsimanngillat, taarsiulluguli ataatassaa persuttaasutut eqqartuunneqarluni, arnaalu ilatsiinnarsimasutut eqqartuunneqarluni, tassa inummik malunnavissumik inuunerminik ulorianartorsiortumik ikiuiniarsimanngitsutut.

- Unnerluussisunit tamanna isumaqatigisimanngeqaarput, taamaattumillu kredsrettip eqqartuussinera Nunatta Eqqartuussivianut ingerlateqqipparput maannalu tassa piumasaqaatitsinni eqqartuussiviup ilalerpaatigut.

Kalaallit Nunaata Eqqartuussiviata pineqaatissiinermik aalajangiinermini tunngavigai toqutsinermik suliassani aallaaviusartoq ukiuni arfinilinni pinerluuteqarnermut inissiisarneq, oqarlunili sakkortunerulersitsisumik pisoqarsimasoq, pineqarmat meeraq persuttaanissamik pissutissaqartitsinngitsoq, ilanngullugulu pineqartoq toqutsineq sioqqullugu meeqqanik sakkortuumik naalliutsitsineq.

Unnerluussisut malillugit eqqartuussut takussutissaavoq nalinginnaasumik sakkutusiissutaalluinnartoq meeqqamik persuttaanermik pingaartumillu toqutsinermik pisimasut.

- Pisimasoq alianartorujussuuvoq pinngitsoorusunnaraluaqisoq, Morten Nielsen oqarpoq.