Kuannersuit
Marraap radioaktiviusup sisunissaa ilisimasallip ernummatigaa
Avatangiisinik illersuiniaqatigiiffiit arlallit Jan Willem Storm van Leeuwen, Nuclear Consulting Groupimeersoq, GME-p avatangiisinik misissuineranik nalileeqqusimavaat. Piiakkat sinnerisa toqqorneqarnerisa qularnartoqarsinnaanera taassuma ernumassutigaa
Kuannersuarni piiakkanit sinneruttut Tasermi toqqorneqartussaapput. Taakku ajornerpaamik pisoqartillugu Narsamut kuussinnaanerat, Jan Willem Storm van Leeuwenip Nuclear Consulting Groupimeersup ernumassutigaa.
Urani Naamik, Avataq, NOAH avatangiisinullu illersuiniaqatigiiffiit allat avatangiisinut sunniutaasussanut nalilersuinermut (VVM) missingiutip ilaa, GME-mit Kuannersuarni suliniummut tunngatillugu suliarineqarsimasoq saqqummiunniarlugu aalajangersimapput.
Aamma atuaruk: Isertortumik uranisiornermut nalunaarusiaq saqqummiunneqarpoq
Tamatuma saniatigut Jan Willem Storm van Leeuwen, arlaannaanulluunniit attuumassuteqanngitsumik siunnersuisartutut sulisoq avatangiisinut nalunaarusiaq nalilernissaanut illuatungiliuttutut ilanngussamittut piumaffigisimavaat.
Saffiugassiassat piiaanermi sinneruttut tailingsinik taaneqartartut toqqorneqartarnissaat taassuma taakkartugaasa ilagaat. Taakku Tasermi toqqorneqartussaapput, taassuma imertaa sinnikut anorimit tingitaannginnissaannut mattussisussaammat.
Naak uran aamma aatsitassat qaqutigoortut piiarneqaraluartut sinneruttut qinngornernik ulorianartunik aamma toqunartunik akoqartussaapput.
Taseq tailingsinik toqqorsiviunissaanut naammattumik itissuseqanngilaq, taamaattumillu pilersaarut malillugu imaa annertusiniarlugu sapusiortoqartussaavoq.
Atuaruk: GME-p suliniutaanut avatangiisinut sunniutinut nalunaarusiaq AG-mit takoqqusaanngitsoq
Sapusiarlu taanna avatangiisit pillugit nalunaarusiap piiaaffiup matuneqareernerata kingorna aamma atanissaanut piviusorsiunngitsumik takusassiarigaa, Jan Willem Storm van Leeuwen isumaqarpoq.
- Taakku isummersuutit qiviaraanni piviusorsiunngillat, naliliinermini taanna allappoq.
Sapusiap ukiuni hunnorujulikkaani atasinnaanerarneqarnera pillugu aamma naliliivoq.
- Sapusiap piffissami qaquguluunniit aserornissaa apeqqutaagunanngilaq, kisianni qaqugu aserornissaa apeqqutaaginnarpoq, Jan Willem Storm van Leeuwen, atomip nukinganik atuinermut isornartorsiuilluni nalunaarusiortarnermut ilisimaneqartoq oqarpoq.
Atuaruk: Naalakkersuisoqatigiit uran pillugu apeqqut pinngitsoorsinnaavaat
Ajornerpaamik pisoqassappat sapusiaq putusinnaasoq takorloorpaa:
- 10 millionit kubikmeterit toqunartut aamma ulorianartunik qinngornillit qaqqatigut Narsap qooruatigut kuunnerannik kinguneqarsinnaavoq, taanna taama ernumassuteqarpoq.
Jan Willem Storm van Leeuwen Brasiliami pisimasoq assersuutigaa, tassani saviminissaq piiaaffimmit novembarimi 2015-imi taama pisoqarpoq.
GME-p VVM-imik nalunaarusiaa missingiutaannaavoq. Aatsitassarsiornermut oqartussat akuersinnginnerminni paasissutissarpassuit piumavaat.