Martsimi atuarneqarnerpaasimasut
Qamuteralalluni ajutoortoqarnera, Naalakkersuisut siulittaasuat aamma nutaarsiassaqartitsiviup akornanni aaqqiagiinngitsoqarnera kinaassuserlu pillugu apeqqut. Allaaserisat taakkununnga tunngasut martsimi atuarneqarnerpaasimapput.
Nittartakkami Sermitsiaq.AG-mi martsimi atuarneqarnerpaasimasut assigiinngisitaartuupput.
Martsimi atuarneqarnerpaaq Nuup eqqaani Kangerluarsunnguani qamuteralallutik sikukkut nakkartoortut pillugit allaaserisaq. Pisumi inuit marluk nakkarput. Aappaa ajunaartoq, aappaa annappoq.
Allaaserisaq atuaruk, imaluunniit atuaqqiguk:
Qamuteralaat Nuup eqqaani sikukkut nakkartut: Inuit marluk nassaarineqarput
Allaaserisani atuarneqarnerpaat tulliattut inissippoq tusagassiorfiup Naalakkersuisullu siulittaasuata akornanni aaqqiagiinngitsoqarnera. Tusagassiortoq namminersortoq ministeriuinerup nunatsinnut tikeraarnera pillugu TV2-mit suliakkerneqarpoq. Ilulissaniinnerminili TV2 tunuliaqutarigamiuk Naalakkersuisut Siulittaasuannit Múte B. Egedemit oqaaseqarfigineqarumanngilaq.
Mútelu aaqqiagiinngissuteqartoqareersoq tusagassiortoq Ilulissani pisunit peqataajunnaarpoq
Kalaaliuneq Inuk-nerluunniit pillugu oqallinnerit inuiaqatigiinni initusarput. Nivi Rosing nunatsinni oqartussanit kalaaliuneranik uppernarsarneqarsinnaannginnera pillugu allaaserisaq aamma atuarneqangaatsiarpoq. Allaaserisaq martsimi atuarneqarnerpaat pingajuattut inissippoq.
Nunatta Nivi Rosing kalaaliusoq (Inuk) uppernarsarsinnaanngilaa