Mary Arctica ungasissorujussuarmiippoq
Royal Arctic Linep umiarsua ´Mary Arctica´ Sikuiuitsumi Kujallermi suliaqarluni angalavoq, taamaasillunilu ´angerlarsimaffimminit´ ungasinnerpaaffissaminiilluni.
Umiarsuaq inuttaalu - nalinginnaasumik Kalaallit Nunaata Danmarkillu akornanni angalasartut - imaani sikulimmi angalanermik misilittagaqarnertik pissutigalugu attartorneqarsimapput Sikuiuitsumi Kujallermi ilisimatusarfittut stationinut pingasunut - tassa belgiamiut, tyskit norskillu ilisimatusarfiinut - pilersuisussatut.
Mary Arcticalu suliaminik aallartitsilluarsimavoq. Belgiamiut stationeqarfianni Princess Elisabeth Base-mut, Crown Bay eqqannguaniittumut, usingiarneq sukkasoorujussuarmik ingerlanneqarsimavoq atugassarisat ajornakusooraluartut - belgiamiut assartukkanik usingiaaffigineqartut quppernerminni nittartakkami allapput.
Crown Bay-meereerluni Mary Arctica 3 East-imut ingerlaqqippoq, tassani norskinut assartukkat sikup sinaanut usingiarneqassallutik.
Kiisalu Queen Muad Landimi Akta Bay-mut ingerlaqqissaaq, tassaniilluni tyskit ilisimatusarnermi stationeqarfiat.
Ilisimatusarnermi stationeqarfinnut taakkununnga pingasunut assartugassat kingulliit Sydafrikami Cape Townimi usilersuunneqarput, tassanilu Mary Arctica sukkassutsimigut tupigusutsitsereerpoq.