Meeqqanut ileqqaarutit atorunnaarsippaat
Naalakkersuisunngorlaat meeqqanut ileqqaarutit atorunnaarsinniarpaat aningaasallu meeqqat inuusuttuaqqallu pisariaqartitaviinut atorusunnerullugit.
Naalakkersuisut meeqqanut ileqqaarutit Siumumit pingaartinneqaqisut qinersinermilu siuliani 2005-imi oqallisaaqisut atorunnaarsinniarpaat.
Ileqqaarnissaq ukiumi tullermi inatsisartut ukiakkut katersuunneranni akuersissutigineqarpoq ukiullu tamaasa landskarsimut 18 millionit koruuninik akeqarluni. Kalaallit Nunaanni meeqqanut tamanut 0-imiit 18-it tikillugit ukiulinnut kontoinut ikineqartarput. Inuusuttut 18-inik ukioqalerpata aningaasat tigusinnaavaat.
Ileqqaarutinut taarsiullugit naalakkersuisunngortut nutaat »meeqqanut inuusuttuaqqanullu tapersersorneqarnissamik pisariaqaritsitsilluinnartunut suliniutinut« atorniarpaat. Tamanna takuneqarsinnaavoq Inuit Ataqatigiit, Demokraatit Kattusseqatigiillu Partiiata naalakkersuisooqatigiinnissamut isumaqatigiissutaanni pingasunngornermi saqqummiunneqartumi.