Meeqqanut inuusuttunullu ulloq unnuarlu angerlarsimaffiit Kommuneqarfik Sermersuup tigorusuppai
Pineqartut tassaapput ulloq unnuarlu angerlarsimaffiit ullumikkut Namminersorlutik Oqartussanit pigineqarlutillu aqunneqartut. - Pitsaanerusumik akikinnnerusumillu aqussinnaavagut, borgmester Avaaraq Olsen (IA) tunngavilersuivoq.
Nuna tamakkerlugu meeqqanut inuusuttunullu angerlarsimaffiup avataanut inissinneqarsimasunut angerlarsimaffiit 25-iupput. Taakkunannga pingasut kommuninit pigineqarput, aqqanillit namminersorlutik oqartussanit pigineqarput kiisalu aamma aqqanillit imminut pigisutut ingerlataallutik.
Kommuneqarfik Sermersooq ataatsimik ulloq unnuarlu angerlarsimaffiuteqarpoq, tassa børnehjemmi "Tupaarnaq", Nuummiittoq kommunip pigisarigamiuk.
Maanna Kommuneqarfik Sermersooq siunnerfeqarpoq namminersorlutik oqartussat ulloq unnuarlu angerlarsimaffiutai kommunimiittut tigussallugit, taakku tassaapput Prinsesse Margrethes Børnehjem Tasiilamiittoq, Meeqqat Illuat Nuummiittoq, Kaassassuk Nuummiittoq, Angerlarsimaffik Ivaneq Nuummiittiqaammalu Angerlarsimaffik Aja, aamma Nuummiittoq.
Aatsaavissuaq isumassarsiaq pinngunngilaq. Tassami 2018-mi upernaakkut, taamanikkut meeqqanut ilaqutariinnullu ataatsimiititaliaq siunnerfimmik assingusumik qaqitsinikuuvoq.
Politikkikkut kissaataavoq
Aningaasaqarnermut inuussutissarsiornermullu ataatsimiititaliap suliamik suliarinninnissaanut tunngavissiami atuarneqarsinnaavoq tigusinissamik suliniuteqarnissaq politikkikkut kissaataasoq, taamaalilluni aamma tigusinissamik siunertaqarluni Namminersorlutik Oqartussanut saaffiginninnissaq ataatsimiititaliamit akuerineqassasoq innersuussutigineqarluni, tassalu ulloq unnuarlu angerlarsimaffiit Namminersorlutik Oqartussat pigalugillu ingerlataat kommumimit siunissami pigineqarlutillu ingerlanneqalissasut periarfissarsiuunneqarumalluni.
Borgmesteri Avaaraq Olsen (IA) isumaqarpoq sutigut tamatigut pissutissaqarluartoq ulloq unnuarlu angerlarsimaffinnik pineqartunik tigusinissaq:
- Qularutiginngilara Namminersorlutik Oqartussanut sanilliullugu pitsaanerusumik akikinnerusumillu ingerlatsisinnaasugut. Uagut angerlarsimaffiuterput aqqutigalugu takussutissaqarpoq pitsaanerusoq innuttaasunut qanimut sullissisutut aqutarilissagutsigu, tassami ulloq unnuarlu angerlarsimaffiit eqaannerusumik aaqqissorsinnaavagut, Avaaraq Olsen Sermitsiaq.AG-mut nassuiaavoq.
Tunngavilersuutigisaanut aamma ilaavoq kommunip pitsaassutsimik tunniussisinnaassuseqarnera, tamannalu meeqqat inuusuttullu malugisinnaasaannik pisinnaalluartoq:
- Meeqqat inuusuttullu ulloq unnuarlu angerlarsimaffiutitsinniittut toqqissisimapput. Naak ulloq unnuarlu angerlarsimaffimmi najugaqartariaqalernerannut pissutaasut ilaatigut oqimaatsuusinnaagaluartut, aqqutaa tamaat malinnaaffigineqartarput, taakkunanngami arlallit ilinnialerlutik namminneq inuuneqalernissaminnut aqqutissiuussisarnerisa takutippaat tamanna.
Meeqaat avatangiisitik qaninnerit qimannagit inuussapput
Borgmesteri Avaaraq Olsen taamatut kissaateqarnerminnut tunngavilersuutigivaattaaq kommunimut assut pingaartoq qulakkiissallugu meeqqanut pitsaanerpaamik tunngavissiisarnissaq aammalu ulloq unnuarlu angerlarsimaffinnut nuutsitsisariaqarnermi meeqqat aallaavigalugit inissiisoqartarnissaa qulakkeersimarusunneqarmat:
- Assersuutigisinnaavarput Tunumi meeqqanik angerlarsimaffiup avataanut inissiisarneq. Meeqqat ilai kitaanut inissinneqartarput, taamaalillutillu ilaquttaminnut attaveqarnerat inornarnerulersinneqartarluni. Uagut, ulloq unnuarlu angerlarsimaffinnik tigusinissatsinnik iluatsitsissagutta, qulakkeerusupparput inissiinerit aaqqissorneqartassasut meeqqat pisariaqartitaat aallaavigalugit. Taamaammat matumani assersuutittut kissaatigaarput meeqqat Tunumiittut angerlarsimaffiup avataanut inissinneqassappata, taava aamma tunumiiginnarsinnaanissaat qulakkeerniartassavarput, taamaalillutimmi avatangiisit sungiusimasatik qimassanngilaat, angerlarsimaffiup avataanut inissiineq avaqqunneqarsinnaajunnaarsimatillugu, Kommuneqarfik Sermersuup borgmesteria, Avaaraq Olsen (IA) tunngavilersuivoq.
Borgmesteri aamma erseqqissaavoq ulloq unnuarlu angerlarsimaffiit tiguneqassappata sulisui ilanngullugit aamma kommunimut nuussasut pingaartikkitsik.
Maanna aningaasaqarnermut inuussutissarsiornermullu ataatsimiititaliaq ilaleereerpoq suliap ingerlaqqinnissaanut, tullinnguuppoq kommunalbestyrelsip suliap ingerlatiinnarnissaanut akuersinissaa, tamannalu pereerpat tigusisinnaanermut tunngatillugu Namminersorlutik Oqartussanut isumaqatigiinniarnerit aallartinneqarsinnaalissapput.