Meeqqat 823-t Kalaallit Nunaanni 2018-imi innunngorput

Meeqqat 2018-imi inunngortut 823-upput, nukappiaqqat niviarsiaqqanit amerlanerulaarlutik.

Nunatta Nakorsaaneqarfiata allakkiaani taama allassimavoq.

Nukappiaqqat 430-t inunngortut, niviarsiaqqat 388-it inunngorsimapput.

Marlulissat katillugit qulit aamma inunngorput.

Inunngortunit katillugit meeqqat arfineq-pingasut ajoraluartumik toqungallutik erniupput, imaluunniit inunngoreernerminnit sapaatip akunnerani siullermi toqusimallutik.

Nakorsaaneqarfiup allakkiamini ilisimatitsissutigaa uumallutik erniusut agguaqatigiissillugu 3.513 gramminik oqimaassuseqarsimasut, agguaqatigiissillugulu 51 cm-inik angissuseqarsimallutik.

- Ummallutik erniusut akornanni oqinnerpaaq 526 grammiuvoq (naartulernermiit sap. ak. 22-issaanni) oqimaannerpaarlu 5.585 grammiulluni (naartulernermiit sap. ak. 39-issaanni).

- Uumallutik erniusut akornanni minnerpaaq 26 cm-iuvoq (naartulernermiit sap. ak. 27-issaanni) tannerpaarlu 57 cm-iulluni (naartulernermiit sap. ak. 38-issaanni 40-ssaannilu), allakkiami ilisimatitsissutigineqarpoq.

Qarasaasiakkut allattugaatinut nalunaarsuiffik

Qarasaasiakkut allattugaatinut nalunaarsuiffik Cosmic nunatsinni tamarmi atulersinneqarsimavoq, taannalu atorlugu paasissutissat tiguneqarsinnaasimallutik.

- Napparsimasut ataasiakkaat pillugit qarasaasiakkut allattugaatinut nalunaarsuiffimmik atuineq aallarterlaajummat paasissutissat nalunaarsunngitsuukkat, kukkusumik nalunaarsukkat assigisaallu nangaanartoqarput.

2018-imi ernisarfiit tassaapput Nuuk, Aasiaat, Ilulissat, Sisimiut, Qaqortoq aamma Tasiilaq.

Ernisut pillugit kisitsisit:

• 98,8 procentii ernisarfinni atuuttuni ernipput
• 10 procentii pilatsillutik ernipput

Ernisut amerlanerpaartaat Dronning Ingridip Napparsimmavissuani ernipput, tassa 535-t Nuummi inunngoramik, tassa nunatsinni 2018-imi inunngortut 66 procentii.

Inuusuttuaqqat angajoqqaanngortut

Nakorsaaneqarfiup allakkiaani inuusuttuaqqat anaananngortut ataatanngortullu allakkiamini ilaatigut sammisimavai.

Kisitsisit takutippaat arnat 68-it 20-nik ukioqalertigatik 2018-imi meerartaarsimasut. Taakkunannga 19-it suli 18-inik ukioqaleratik meerartaarput.

Kalaallit Nunaanni Naatsorsueqqissaartarfiup kisitsisaatai naapertorlugit 2017-imi 20-nik ukioqalertigatik anaananngortut 72-iusimapput.

Angutit 2018-imi 20-nik ukioqalersimanatik ataatanngortut 13-iusimapput. Taakkunannga marluk 18-inik ukioqalertigatik ataatanngorsimallutik.