Meeqqat atuartariaasiat misissorneqarpoq

Kalaallit meerartaat atuarnissaminnut qanoq ilinniartarnersut, atuarniarnerminnilu ajornartorsiuteqartut pillugit ilisimasat annikitsuinnaapput.

Ivalu Mathiassen meeqqat atuartariaasiat pillugu ilisimatusarpoq. Suliniutip siunertaa tassaavoq meeqqat kalaallit oqaasiinik atuarnermik allannermillu atuartinneranni periusissiat pitsaanerpaat paasissallugit.

Ilisimatusarluni aallartinneranit ukiup affaa qaangiutiinnartoq paasisat soqutiginartoqalereersut oqarpoq. Ivalup Avannaani atuarfiit tikeraarsimavai.

- Atuarfinni pulaakkanni meeqqat naapitakka taanikkaarillutik atuartarput. Misiliinerni ilinniartitsisut peqataapput, atuartullu ilaat atuarniarnermikkut unammilligassaqartut ajornartorsiutaasa annertussusaat ilinniartitsisunit tupaallaatigineqarpoq, Ivalu Mathiassen nassuiaavoq.

EyeJustRead, danskit suliffeqarfiutaat atuarniarnermikkut ajornartorsiuteqartunut ikiuutinik peqartoq, naqinnernillu ilisarinnissinnaanngitsuunermut misiliuteqarlunilu tapersersuisartoq, Ivalu Mathiassenip ilisimatusarnerani suleqataavoq. Atuakkat meeqqanut atuartunut nukarlernut tulluarsakkat EyeJustReadip atortuinut nussorneqarsimapput, meeqqat atuartariaasiannik misissuisoqarsinnaasunngorlugu nalilersuisoqarsinnaasunngorlugulu.

Suliniutit meeqqamut tulluarsakkat

Ivalu Mathiassenip ilisimatusarnera 2025-mut killeqarpoq, ilisimatusarnininilu Ph.D.-nngorniutigalugu Ilisimatusarfimmi illersussavaa.

- Neriuppunga ilisimatusarnera meeqqat kalaallisut atuarniarnermik atuartinneqarneranni suliniutinik tulluartunik nassaarfigalugu atorneqarsinnaalissasoq. Meeqqat naqinnernik ilisarinnissinnaanngitsuunermut ersiuteqartut atuarniarnermikkulluunniit allatigut ajornartorsiuteqartut misilinneqartarnissaannut ilisimatusarnera atorneqarsinnaajumaarnersoq aamma pissanganarpoq, Sermitsiaq.AG-mut oqarpoq.

Ivalu Mathiassen ukiaru kujataanut atuarfinnut pulaassaaq, Kommuneqarfik Sermersuumilu atuarfimmik ataatsimik aamma pulaagaqassalluni.