GM KNRikkut
Meeqqat GM-rnerat taamaattumik KNRip aallakaatinngilaa
Pissartanngorniuttunit KNR-mi aallakaatitsinerni inersimasut salliutinneqartarput
Siumut sinnerlugu Inatsisartuni ilaasortap Jens Immanuelsenip ippigaa meeqqat inuusuttuaqqallu unammersuarnerannit KNR-mi aallakaatitsisoqannginnera. Nassuiaatissartaali tassaavoq aningaasaqarniarneq aamma KNRip timersoqatigiillu kattuffiata akornanni isumaqatigiissut, ilinniartitaanermut, ilagiinnut, kulturimut naligiissitaanermullu naalakkersuisoq Nick Nielsen Siumumeersoq nassuiaavoq.
Atuaruk: Siumukkormiu: Sooruna meeqqat unammersuarnerat KNRip aallakaatinngikkaa?
Arsaannermi Brasiliami VM-rtoqarneranit nalunaaquttap akunnerpassui aallakaatitsisoqarpoq DRip aamma TV2p aallakaatitaat aallakaatinneqarmata. Tamatumali kingorna meeqqat inuusuttuaqqallu julimi Nunatsinni unammersuarmata KNR-mi aallakaatinneqanngillat.
Inersimasut kisiisa akissaqarfigaat
Jens Immanuelsen isumaqarpoq meeqqat inuusuttuaqqallu unammersuarnerisa aallakaatinnissaat aamma akissaqartinneqartariaqartoq nalunaaquttap akunnerpassuini arsaannermi VM aallakaatinneqarsinnaappat. Taamaammat paragraf 37 naapertorlugu naalakkersuisunut apeqquteqarpoq paasiniarlugu meeqqat inuusuttuaqqallu unammersuarnerat aallakaatinneqartalersinnaanersoq.
Nick Nielsen Jens Immanuelsenimut nassuiaavoq KNRimi aallakaatitassat pillugit Naalakkersuisut akuliussinnaatitaanngitsut. Taamaattorli Naalakkersuisut KNRimut paasiniaasimapput sooq meeqqat inuusuttuaqqallu unammersuarnerat aallakaatinneqartannginnersoq paasiniarlugu.
- KNRip timersoqatigiit kattuffiat suleqatigalugu pingaarnertut inersimasut pissartanngorniullutik unamminerisa aallakaatittarnissaat toqqarpaa, Nick Nielsen Jens Immanuelsenimut akissummini allappoq.
VM akeqanngilaq
Nick Nielsen aamma nassuiaavoq meeqqat unammersuartarnerat unammilluni pinnguarnertut isigineqartoq. Aamma Nick Nielsenip nassuiaanera malillugu KNR akissaqanngilaq sineriammi unammersuarnernut sulinik angalatitsinissaminut.
Arsaannermi VM-rtoqarnerani aallakaatitarpassuit aamma pisimapput KNRip, DRip TV2-llu isumaqatigiissutaat malillugit tassanilu akeqanngiusartumik aallakaatitsinissamut periarfissaqarpoq.