Meeqqat ilaqutariillu atugaat misissorneqassapput
Kalaallit Nunaanni meeqqat ilaqutariillu qanoq atugaqarnersut takussutissaqanngilaq, taamaattumik atugarissaarneq pillugu misissuineq annertooq aallartinneqassasoq knr.gl allappoq.
Oktobarip naalernerani misissuineq aallartinneqassaaq, oqarasuaatikkullu misissuisoqassaaq. Naatsorsueqqissaartarfik Kalaallit Nunaanni inunnik 1200-nik toqqaassaaq, taakkulu aqqi isertuullugit atugaat pillugit apersorneqassapput.
- Apeqqutinut immersuiffissami angusat naapertorlugit politikerit suliniuteqassapput. Immersuiffissamilu ilaqutariit nalinginnaasumik qanoq atugaqarnersut takuneqarsinnaassaaq, soorlu aningaasaqarnermut tunngasut pillugit, Ilaqutariinnut pisortaqarfimmi AC-fuldmægtig, Lise G. Kristensen oqarpoq.
Apersuilluni misissuineq 2009-imi naammassissagatinneqarpoq. Ukiut sisamat aamma arfineq-pingasut qaangiuppata apersorneqartut apersoqqillugit misissueqqittoqassaaq.
Københavnimi Isumaginninnermi Ilisimatusarfik suleqatigalugu misissuisoqassaaq kalaallisullu apersuisoqassaaq.