alkoholproblemer
Meeqqat imigassamut politikkilioqataassapput
Tasiilami angajoqqaat sinniisaat ilinniartitsisunik atuartunillu peqateqarlutik meeqqanut inuusuttuaqqanullu imigassamut politikkimik inaarutaasumik ilusilersueqataassapput
Tasiilami Alivarpimi atuarfiup siulersuisui ukiumoortumik nalunaarusiartik saqqummiukkumallugu marlunngornermi ataatsimiigiaqqusipput.
Atuarfiup siulersuisuisa siulittaasuata Nunnuma Olsenip ukiumoortumik nalunaarusiaq saqqummiuppaa, tamatumalu kingorna ilinniartitsisoq Nukannguaq Kristiansen atuarfiup imigassamut politikkimik atuartut akuutinneqarfigisaannik ilusilersuinissaa siunertaralugu imigassaq pillugu oqallissaarummik saqqummiussilluni.
Tasiilami Alivarpi, Nuummi USK kiisalu Nuummi Aasiannilu ilinniarnertuunngorniarfiit meeqqat inuusuttuaqqallu akornanni imigassamik atuinerup annikillisarnissaa siunertaralugu imigassamut politikkimik ilusilersuinissamut atatillugu misiliuteqartussatut toqqarneqarsimapput.
Angajoqqaat 20-t missaanniittut takkupput, taamaattumillu takkuttut suli amerlanerusinnaagaluarlutik, najuuttulli illoqarfiup atuarfiullu imigassamik ajornartorsiutinik sunik misigisaqartarnerat illoqarfimmilu imeriaaseq pitsaavallaanngitsoq allanngortinniarllugu inuiaqatigiinnit atuarfimmillu sunik suliniuteqartoqarsinnaanera pillugit oqallilluarput.
Imigassamik ajornartorsiutit annertuut
Imigassamik ajornartorsiutit annertunerat saqqumilaarnerallu oqartussanillu arlalinnit ataatsimoorussamik suliniuteqartoqartariaqarnera isumaqatigiissutigineqarpoq - minnerunngitsumilli illoqarfimmi imeriaaseq ilorraap tungaanut ataavartumillu allanngortinniarlugu angajoqqaat innuttaasullu saaffiginissaat pingaartinneqarluni. Allanngornernik ataavartussanik pinngitsaaliissuteqarluni pilersitsisoqarsinnaannginnera kisiannili meeqqat atugarissaarnissaat pillugu tamatumalu nassatassai pillugit oqaloqatigiinnikkut imeriaatsip pitsaanerpaamik sunnerneqarsinnaanera Nukannguaq Olsenip erseqqissaatigaa.
Tamatumani tamat oqalliseqataanerunissaat ammanerunissaallu pisariaqarpoq, avataaniillu immikkut ilisimasalinnik allanillu aggersaasoqassaaq kiisalu inuusuttuaqqanut sunngiffimmi neqeroorutit amerlanerusariaqarlutik, imigassamut taarsiullugu allanik periarfissaqarluarsinnaaqqullugu.
Unnuk naggaserlugu angajoqqaat sinniisaannik sisamanik qinersisoqarpoq, taakkualu ilinniartitsisut atuartullu peqatigalugit meeqqanut inuusuttuaqqanullu imigassamut politikkissamik inaarutaasumik ilusilersuissapput. Angajoqqaat qinerneqartut tassaapput Martha Brandt, Nikolaj Haraldsen, Marie Heimer aamma Dana Maqe.