Meeqqat inuusuttullu aalisagartunngippallaarput
Nerisaqarnermut siunnersuisartut naapertorlugit nerisat pisariaqartitat affaat inorpaat. 4-niit 24-inik ukiulinni pingasuugaangata marluk kissartutortilutik aalisagartorneq ajorput.
Meeqqat inussuttullu aalisagartunngippallaarput, ineriartornerlu killormut ingerlavoq. Ullumikkumut sanilliullugu marloriaammik aalisagartornerusariaqaraluarput, DTU Inuussutissanik nioqqutissiornermut nakkutilliisoqarfik ilisimatitsivoq.
Meeqqat inuusuttullu inuussutissanik naammattunik soorlu D-vitamin-inik, selen-inik orsullu syre-nik pingaarutilinnik pissarsisinnaassagunik nerisaqarnermut siunnersuisartut naapertorlugit ullormut 200 grammit 300 grammillu akornanni nerisaqartartussaagaluarput. Taakku affaat aalisakkat orsortuut soorlu kapisillit, ammassassuit makrel-illu. Kisianni 4-niit 24-inik ukiullit amerlanersaat sapaatip akunneranut aalisakkanik 100 grammit missaannaannik nerisaqartarput. Taamaattutoraangamillu aakisakkanik orsukitsunik orsortuunillu nerisarput.
Ilisimatuut misissuinerit marluk imminnut sanilliuppaat, tassa meeqqat inuusuttullu nerisaqarnermi ileqquat 2000-2004 aamma nuna tamakkerlugu nerisaqarneq pillugu misissuineq 1995. Sanilliussinermi paasinarsivoq meeqqat inuusuttullu siornatigumut sanilliullugu aalisagartornikinnerulersimasut. Aalisakkanik qallersuutitut atuinerat 1995-imi 40-60 gramminiit 2000-2004-mi 30 grammiinnanngorsimavoq. Ukioqatigiikkuutaat aalisagartunnginnerpaat tassaapput 11-iniit 14-inut ukiullit, taakku sapaatip akunneranut 20 grammiinnarnik aalisagartortarput.
Aamma nerisassatut pingaarnertut aalisagartortarnerup annertussusia milleriarsimavoq. Meeqqat inuusuttullu 1995-imi 35-55 gramminik nerisaqartarsimasut, 2000-2004-mi sapaatip akunneranut 35 grammit missaannaanniippoq. Amerlanersaat pingaarnertut nerinermi aalisagartorneq ajorput. 4-niit 24-inik ukiulinni agguaqatigiisillugu taamaallat sisamaagaangata ataatsip imaluunniit pingaasuugaangata ataatsip akornanni sapaatip akunneranut ataasiarlutik aalisagartortarput.