Meeqqat 'Kammagiitta -Fri for mobberi' misilerarpaat
'Kammagiitta - Fri for mobberi' Kalaallit Nunaanni meeqqerivinni 90-ini atuarfinnilu 84-ini pinaveersaartitsinermi atorneqartussaq massakkut meeqqeriviit qinikkat arfineq pingasut misilerarpaat.
Kommunini tamani meeqqeriviit marluk suliniummi peqataapput. Misiliiffigineqartuni milittakkat ataavartumik nalilersorneqartarput, taakkulu naleqqussaanissami tunngavigineqassapput, Inerisaavik allappoq.
'Kammagiitta - Fri for mobberi' naammassivissoruni kalaallit pisariaqartitaannut naleqqussakkatut atortussanngortinneqassaaq. Eqqarsaataavoq taanna 2011-imi aasakkumiit 2012-ip tungaanut kommunini sisamani paaqqinnittarfinnut atuarfinnullu tamanut siammartinneqassasoq, suliniullu politikikkut tapersersorluarneqalereersimavoq.
Mary Fondenip Red Barnet-illu 'Fri for mobberi' Danmarkimi atortillualereerpaat. Tappavanilu meeqqat 70.000-it peqataatinneqalereerput, dr.dk allappoq.
Ilaqutariinnut naalakkersuisoqarfiup Det Nationale Forskningscenter fot Velfærdillu ilaqutariit 0 - 14-inik ukiulinnik meerartallit atugaat misissuiffigisimavaat, nalunaarusiarlu siorna saqqummerpoq.
Nalunaarusiami erserpoq Kalaallit Nunaanni meeqqat 0 - 14-inik ukiullit amerlanersaat nalinginnaasunik pitsaasunillu atugaqartut, ikinnerussuteqartulli - meeqqat pingajorarterutaasa missaat - imaanngilluinnartunik atugaqartut.
Ikinnerussuteqartut ilarpassui qinngasaarneqarput kammagiumaneqartaratillu, imaluunniit inuunerminni atuarfimmilu atugarliortuupput.
Inersimasut aperineqartut 15 procentii isumaqaråut qitornatik akuttunngitsumik qinngasaarneqartartut, 8 procentiilu oqaluttuarpoq namminneq qitornatik massakkorpiaq kammaqanngitsut.
Angajoqqaallu affaannit amerlanerusut oqaluttuarput qitornatik meeraqatiminnit ajortisaarneqartarlutilluunniit qinngasaarneqartartut.